Час для рэлаксу

Молодежный курьер

“Ты заўжды ў адказе за тых, каго прыручыў”, – казаў Ліс Маленькаму прынцу. Гэты крылаты выраз з філасофскай казкі тоіць у сабе глыбокі роздум аб прыгажосці чалавечых адносін.

Але без жыццёвага прыкладу гуманная думка пісьменніка-рамантыка Сент-Экзюперы рызыкуе застацца галаслоўнай, не абудзіўшы ў сэрцы дабрыні і чуласці. Бо, “калі сябе прыручыш, потым здараецца і плакаць”, – засмучаўся ўсё той жа Ліс.

У Валожынскім дашкольным цэнтры развіцця дзіцяці “Расінка” знайшлі спосаб прывіваць дзецям ідэалы вернага сяброўства і спагады праз клопат аб братах нашых меншых.

Тут ужо дзесяць гадоў жыве дэкаратыўны трус Філя – улюбёнец дзетвары. Кожная з шасці груп дашкольнікаў па месяцы даглядае вушастага гадаванца. Дзеці стараюцца разнастаіць меню пушыстага звярка: прыносяць з дому моркву, збожжа, галінкі яблыні і грушы. Сочаць, каб у клетцы труса заўсёды было сена і свежая трава.

Цяпер Філя жыве ў адзіноце, страціўшы сяброўку-трусіху. Каб вушасты гадаванец не нудзіўся, дзеці і бацькі вырашылі знайсці яму новую пару.

Дашкольнікі клапоцяцца не толькі пра Філю. Даглядаюць дзеці і акварыумных рыбак: у жывым кутку тут пасяліліся плоткі, аранжавы дэкаратыўны сом і водныя смаўжы.

Алена ПАШКЕВІЧ.

Фота аўтара.

 



Добавить комментарий

Ваш e-mail не будет опубликован. Обязательные поля помечены *