Афрыканская чума свiней

Закон и порядок

Афрыканская чума свіней (АЧС) – небяспечная  хвароба свойскіх і дзікіх свіней. Яна характарызуецца хуткім распаўсюджваннем, высокай ступенню смяротнасці.

Лекавыя прэпараты для прафілактыкі і лячэння дадзенага захворвання адсутнічаюць, таму гіне 100% хворых жывёл. Для чалавека афрыканская чума свіней не ўяўляе небяспекі.

Узбуджальнік афрыканскай чумы – ДНК-утрымвліваючы вірус – адрозніваецца вялікай устойлівасцю. У глебе ён можа захоўвацца да 180 дзён, у мясе да  5-6 месяцаў.

Асноўная крыніца ўзбуджальніка інфекцыі – хворыя свінні, якія вылучаюць вірус з мачой, калам і інш. Перадавацца захворванне здаровым свінням можа праз заражаныя вірусам корм, подсціл, гной, трупы і прадукты забою жывёл (мяса, кроў і інш.).

Варта ведаць, што найбольш часта да ўзнікнення АЧС прыводзіць скормліванне свінням харчовых адходаў з хатняй кухні, з розных харчаблокаў і сталовак, адходаў з бойняў, а таксама камбікармоў і зернепрадуктаў, вырабленых у заводскіх умовах, якія не прайшлі тэрмічную апрацоўку.

Клінічныя прыкметы АЧС

Інкубацыйны перыяд захворвання складае 2-7 дзён. У жывёл павялічваецца тэмпература цела да 42 градусаў, з’яўляюцца аддышка, кашаль, знікае апетыт, узмацняецца смага, адзначаюцца прыступы ванітаў і параліч задніх канечнасцей, на скуры ўнутранай паверхні сцёгнаў, на жываце, шыі, вушах, на “пятачку і хвасце бачны чырвона-фіялетавыя плямы. Гібель жывёлы настае на 1-5 дзень. Магчымыя выпадкі раптоўнай гібелі свіней без выяўленых клінічных прыкмет хваробы.

Дыягназ афрыканскай чумы ставіцца комплексна на падставе эпізааталагічных даных, клінічных прыкмет, патолага- анатаміравання трупаў жывёлы і лабараторных даследаванняў біялагічнага матэрыялу.

Уладальнікам асабістых дапаможных гаспадарак, у якіх маецца свінапагалоўе, трэба выконваць шэраг рэкамендацый, якія дазволяць захаваць здароўе жывёл і пазбегнуць эканамічных страт:

– утрымліваць свіней неабходна толькі ў зачыненых памяшканнях, выгульнае ўтрыманне забараняецца;

– для догляду за жывёламі трэба выкарыстоўваць асобную спецвопратку і інвентар;

– нельга дапускаць кантакту свіней з іншымі жывёламі, птушкай і староннімі асобамі;

– для кармлення свіней выкарыстоўваць толькі камбікорм завадской вытворчасці;

– катэгарычна забараняецца выкарыстоўваць для кармлення  харчовыя адходы, адходы забою свойскіх і дзікіх жывёл і камбікорм сумніўнай якасці, набыты ў прыватных асоб без этыкетак і адпаведнай маркіроўкі на ўпакоўках;

– пасля наведвання лесу, удзела ў паляванні ў абавязковым парадку змяніце адзенне, перш чым заходзіць у памяшканне,  дзе ўтрымліваецца жывёла;

–  важна рэгулярна праводзіць у хлявах дэзынфекцыю, наладзіць барацьбу з грызунамі і насякомымі;

– не ажыццяўляйце падворны забой і рэалізацыю свініны без правядзення предзабойнага агляду, важна рабіць ветэрынарна-санітарную экспертызу мяса і прадуктаў забою жывёлы спецыялістамі дзяржаўнай ветэрынарнай службы;

– не купляйце жывых свіней і мясную прадукцыю ў месцах несанкцыянаванага гандлю без ветэрынарных суправаджальных  дакументаў;

– не завозьце свіней і прадукцыю свінагадоўлі з іншых рэгіёнаў без узгаднення з дзяржаўнай ветэрынарнай службай;

– не выкідвайце трупы жывёл, адходы ад іх утрымання і перапрацоўкі на звалкі, абочыны дарог і ў іншых месцах, даступных для жывёлы.

Пра выпадкі ўзнікнення падазроных захворванняў ці падзяжу свіней варта неадкладна паведаміць у раённую ветэрынарную станцыю. Ні ў якім разе нельга замоўчваць падзеж свіней і самастойна ўтылізаваць тушы!

Сяргей ШУПЕНЬКА,

галоўны ветурач раёна



Добавить комментарий