Музейная справа дырэктарам цікавай стала

Общество

На абласным семінары, прысвечаным рабоце школьных музеяў, наш раён прадстаўляла дырэктар Ракаўскай сярэдняй школы Святлана Казіміраўна Адамовіч.

Базай для правядзення семінара былі абраны навучальныя ўстановы Клецкага раёна. У пяці з іх, якія размешчаны ў сельскай мясцовасці і маюць музеі, пабывалі ў той дзень дырэктары школ. Розныя накірункі ў гэтых аб’яднанняў, але кожны з’яўляецца цэнтрам культурнага жыцця свайго рэгіёна. Напрыклад, у адной са школ абсталяваны пакой беларускага ручніка, які  пачынаўся з грунтоўнай навукова-даследчай работы адной з вучаніц, якая ў сваю чаргу навучылася вышыўцы і зацікавілася ёй у гуртку “Умелыя рукі”.

Удзельнікам семінара паказалі, як правільна захоўваць экспанаты, праводзіць інвентарызацыю музейных фондаў, пазнаёмілі з прававой базай па стварэнню музеяў, а галоўнае – з тымі патрабаваннямі, якія прад’яўляюцца да музеяў, што прэтэндуюць на статус народных. Арганізатары семінара спецыяльна правялі вучобу для кіраўнікоў школ, каб яны асэнсавалі нялёгкую працу стваральнікаў музеяў і захавальнікаў традыцый.

У Ракаўскай сярэдняй школе шмат гадоў плённа працуе гісторыка-краязнаўчы музей, які носіць імя яго заснавальніка і першага дырэктара В. П. Налецкага. Цяперашні кіраўнік навучальнай установы раней таксама ўзначальвала музей, так што гэта справа для яе не новая. Школа неаднаразова займала прызавыя месцы ў абласным конкурсе на пастаноўку музейнай работы, на яе базе праводзіўся і рэспубліканскі семінар. Наспеў час рыхтаваць музей на атрыманне ганаровага звання. І апошні семінар даў рэальны штуршок.

Наталля ШТЭЙНЕР.



Добавить комментарий