Кожнай праблеме – сваё вырашэнне

Déversements urgence 24 heures

Падчас “прамой тэлефоннай лініі”, якую праводзіў старшыня райвыканкама Мікалай Анатольевіч Астрэйка, да кіраўніка раённай вертыкалі ўлады паступілі 15 званкоў. На ўсе ўзнятыя пытанні рэакцыя была аператыўная.

Для тэрміновага разгляду і прыняцця мер у зацікаўленыя службы накіравана інфармацыя нераўнадушнага чалавека. Ён паведаміў, што шматдзетная маці з вёскі Крыніца злоўжывае спіртным, і яе дзеці апынуліся ў сацыяльна небяспечным становішчы. А вось другі званок – ананімны – тычыўся просьбы ўстанавіць у мікрараёне Сельгастэхніка надворны тэлефон-аўтамат. Ужо атрыманы і афіцыйны адказ на гэты запыт. У ім паведамляецца, што, згодна з праводзімай у вобласці аптымізацыяй таксафоннага парку, здымаюцца ў першую чаргу вулічныя тэлефоны, з якіх за месяц зроблена менш за 10 званкоў. Таксафон быў устаноўлены ў мікрараёне да 2012 года, аднак сябе не апраўдаў. Цяпер новая яго ўстаноўка немэтазгодная. Бліжэйшая кропка сувязі – у будынку аўтавакзала.

Прагучала яшчэ адна ананімная скарга на невыкананне рэжыму работы Ракаўскага ўнівермага: маўляў, закрываецца гандлёвая кропка раней, чым устаноўлена. З апісанай сітуацыяй разбяруцца ў сціслыя тэрміны.

Наступным да старшыні райвыканкама дазваніўся жыхар вёскі Дзясятнікі, якога цікавіла магчымасць атрымання дадатковага газавага балона: калі газ у папярэднім заканчваецца, чакаць прывозу наступнага даводзіцца часам нават некалькі дзён. Адказ на гэта пытанне атрыманы, з ім можна азнаёміцца на наступнай старонцы нашага сённяшняга нумару газеты.

Пенсіянерка з Кабыльчыцаў падчас “прамой лініі” звярнулася да кіраўніка раёна з просьбай грамадскага характару: пасадзейнічаць, каб вяскоўцаў пачаў абслугоўваць у ліку іншых і аўтамагазін “Еўраопт”. Заява накіравана на разгляд у кампетэнтныя службы.

Прафесіянальная юрыдычная кансультацыя будзе аказана пасля гутаркі са старшынёй райвыканкама жанчыне з райцэнтра: калісьці ў другой палове дома жыла суседка, а пасля таго, як яе не стала, тую жыллёвую плошчу аддалі заяўніцы. Пенсіянерка не пагаджаецца з тым, што цяпер ёй даводзіцца выплачваць падатак як уладальніцы дзвюх кватэр.

Мікалай Анатольевіч прыняў некалькі тэлефонных паведамленняў з Сівіцы. У першым заяўнікі прасілі дапамогі ў завяршэнні газіфікацыі вуліцы Партызанскай названага аграгарадка, у другім паведамлялася аб няспраўнасці плаціны возера ў зоне адпачынку ў вёсцы Пагарэлка, а таксама была выказана просьба разгледзець пытанне аб пераводзе шэрага аб’ектаў сацыяльнай сферы ў Сівіцы на газавае ацяпленне. Сітуацыя ўжо разглядаецца, аб выніках людзей праінфармуюць.

Інтарэсы камунальнай і дарожнай гаспадаркі закраналіся і ў наступных зваротах на суботнюю “прамую лінію”. У прыватнасці, жыхары Слайкоўшчыны прасілі ўстанавіць на вуліцы дарожны знак абмежавання нагрузкі на вось: цяжкія лесавозы разбіваюць дарогу. У гэтым жа населеным пункце працякае ручай, які пасля дажджоў залівае дарогу і прысядзібныя ўчасткі. Меры па ўхіленні падтапленняў і рэгуліроўцы дарожнага руху будуць прыняты ў бліжэйшы час. Таксама дарожнікам належыць прыкласці намаганні па прачыстцы водаадводнай трубы ў вёсцы Строкава Рэчка Гародзькаўскага сельсавета. У доме № 7 па вуліцы Садовай Валожына патрабуецца замена акон у пад’ездзе, таксама там неабходна тэрмінова вырашаць пытанне з адводам вады ад будынка. Аналагічная праблема і ў жыхароў дома № 6 па вуліцы Гагарына райцэнтра, дзе ліўнёвая сістэма не спраўляецца са сваёй функцыяй.

Камунальная і архітэктурная службы раёна зоймуцца распрацоўкай пытання аб стварэнні маладзёжнай і дзіцячай гульнёвых пляцовак – з такой просьбай патэлефанавала жыхарка Валожына з вуліцы Камсамольскай. Будзе вырашацца і праблема падвозу дзяцей да школы з вёскі Макараўка: на рэйсавым аўтобусе малодшыя школьнікі прыязджаюць дадому дастаткова позна.

 

Сяргей САДОЎСКІ

Вы можаце пакінуць каментарый або зваротную спасылку з вашага сайта.

Пакінуць каментарый


приёмная главного редактора


   
Powered by WordPress | Compare Best Sprint Phone Deals Online. | Thanks to Credit Card Deals, Best CD Rates and Sell cars