Валожыншчыну наведалі падарожнікі-аматары з Польшчы

Официально

У сярэдзіне жніўня нашу Валожыншчыну наведалі падарожнікі-аматары з Польшчы.

Працяглы ланцуг з пазадарожнікаў з замежнымі знакамі заехаў у райцэнтр з румскага боку вуліцы Леніна. На плошчы аўтамабілі спыніліся, з іх павыходзілі пасажыры. Падчас кароткай гутаркі ўдалося высветліць, што гэта турысты з самых розных гарадоў суседняй краіны: Беластоку, Лодзі, Варшавы, Познані і іншых. Трыццаць чалавек, у тым ліку і дзеці, у Беларусі ўжо бывалі не адзін раз і паспелі пазнаёміцца са славутымі мясцінамі і гістарычнымі аб’ектамі нашай Радзімы. Сёлета група паставіла мэту наведаць Налібоцкую пушчу і каталіцкія святыні Валожынскага раёна.

Да замежных гасцей найперш, звычайна, звяртаюцца з такім пытаннем: “Ці спадабалася вам у нас?..” Пачуўшы ветлівы адказ “так, вельмі”, суразмоўцы задаволена разыходзяцца. У адной папулярнай песні ёсць радок: “Лучше всяких слов, порою, взгляды говорят…” Дык вось турысты былі бадзёрымі і вясёлымі, твары іх вылучалі прыязную радасць, без адбітку цяжкасцей ці стомы ад далёкай дарогі. Значыць, прыезджым людзям у нас добра і камфортна.

Наперадзе палякаў чакалі Вішнева і Ашмяны. На будучы год яны зноў плануюць прыехаць у Беларусь.

Алена ЗБІРЭНКА
Фота Сяргея САДОЎСКАГА



Добавить комментарий