7 верасня ў Вішнеўскім касцёле Адведзінаў Найсвяцейшай Панны Марыі была асвечана копія абраза Маці Божай з Гетжвальда.

Гетжвальд – невялікі польскі гарадок. Тут на месцы аб’яўлення Дзевы Марыі пабудаваны касцёл і знаходзіцца цудатворны абраз. Яго копію сёлета выканаў мастак Алесь Пушкін, які займаецца рэстаўрацыйнымі работамі ў Вішнеўскім касцёле. Праз некалькі дзён майстар павязе свой твор у суседнюю краіну, дзе яго ўжо чакаюць і рыхтуюцца да ўрачыстай сустрэчы.

Культурная скарбонка вёскі Вішнева ўзбагацілася яшчэ адным фактам. Пра нашу прыгожую мясцовасць, пра велічны касцёл і таленавітых людзей будзе напамінаць абраз у далёкім і пакуль што невядомым Гетжвальдзе.

Прыемна, што з Беларусі экспартуюцца не толькі сыравіна і тавары паўсядзённага попыту, але і каштоўнасці духоўнага плана.

Алена ЗБІРЭНКА

Алесь ПУШКІН і пробашч Вішнеўскага касцёла айцец Юзаф трымаюць копію абраза Маці Божай Гетжвальдскай.