Тэлефон міліцыі – 102

Закон и порядок

ШЫРОКАЕ КОЛА

ЗЛАДЗЕЙСКІХ ІНТАРЭСАЎ

     Сталічных жыхароў, якія ўсё жыццё адпрацавалі на ніве культуры, маюць высокія пасады, прывабіла сваёй прыгажосцю старажытная вёска Лоск. Але настрой і добрыя ўражанні нядаўна здолеў сапсаваць нячысты на руку чалавек. Пад покрывам ночы ён спачатку пранік у дом да аднаго дачніка, дзе “разжыўся” тэлевізарам, а потым пабываў на суседнім участку, дзе яму прыглянуўся DVD-прайгравальнік. Вось толькі злодзей не разлічваў, што ў міліцыі хопіць умення і прафесіяналізму хутка яго адшукаць: хапуга не паспеў нават пакарыстацца ўкрадзенай маёмасцю, як быў арыштаваны і зараз знаходзіцца за кратамі.

Гэтак жа аператыўна прайшло расследаванне па факце знікнення тэлефона ў жыхара Забрэззя. Устаноўлена, што малады мужчына 1993 года нараджэння без ведама гаспадара пабываў у чужой кватэры і забраў сродак мабільнай сувязі.

А вось жыхарка райцэнтра сама запрасіла злодзея ў госці. Пасля візіту пацярпелая выявіла прапажу грошай і вымушана была звярнуцца за дапамогай у міліцыю. Па гарачых слядах супрацоўнікі праваахоўных органаў адшукалі і злачынца, і грошы.

Самы значны крадзеж адбыўся ў пасёлку Першамайскі. Сума ўрону там ацэнена ў 4700 рублёў. Менавіта столькі каштавала гаспадару агароджа з металапрофілю. Невядомыя асобы здолелі панесці 280 метраў профільных лістоў і 180 метраў профільных трубаў. Калі ёсць людзі, якім што-небудзь вядома аб дадзеным факце, то просьба паведаміць у міліцыю.

Вядуцца пошукі зламысніка, які абакраў пенсіянерку са Слайкоўшчыны. Жанчына захоўвала немалую суму грошай у пашпарце. Відаць, “распухлы” дакумент, што ляжаў на стале, і прывабіў злачынца.

Пацярпелы жыхар вёскі Люташ таксама панёс значныя траты: з яго падворка зладзеі ўкралі мангал коштам 700 рублёў.

 

ЗАГУБІЛА ЛЮБОЎ ДА ПІВА

    17 кастрычніка ва ўніверсаме “Ракаўскі” адбыўся адкрыты грабеж. І хоць у выніку “налёту” вялікага ўрону гандлёвай кропцы не нанесена, рабаўнік арыштаваны і яму пагражае рэальнае пазбаўленне волі на працяглы тэрмін.

Справа разгортвалася наступным чынам: пакупнік зайшоў у магазін, узяў дзве бутэлькі піва, адну выпіў, а другую паклаў за пазуху. Калі прадаўцы зрабілі яму заўвагу і папрасілі разлічыцца, мужчына і прыхаваную паўлітроўку асушыў у імгненне вока. Плаціць ён і не збіраўся…

ЧУЖЫЯ “ЖЫГУЛІ”

ДА ТУРМЫ ПРЫВЯЛІ

     У Подберазі затрыманы і адпраўлены ў ізалятар часовага ўтрымання жыхар Смаргонскага раёна, які 12 кастрычніка з аўтамабіля “ВАЗ-2101”, прыпаркаванага на вясковай вуліцы, скраў акумулятар імпартнай вытворчасці.

Пакуль злодзей знаходзіўся за кратамі, праваахоўнікі ўстанавілі і даказалі, што на яго сумленні ёсць і больш цяжкія праступкі. Так, на наступны дзень пасля крадзяжу ён учыніў угон легкавушкі маркі “Жыгулі”. Патрыманую “капейку” мужчына заўважыў каля мясцовай піларамы і скарыстаўся ёй для паездкі. Гаспадару, праўда, пра свае планы паведамляць не стаў.

 

БАЙЦОЎСКІ РЫНГ У МАГАЗІНЕ

     Малады мужчына, які з хуліганскіх намераў распачаў бойку ў магазіне “Мерыдыян”, што размяшчаецца ў мікрараёне Сельгастэхніка райцэнтра, панясе крымінальную адказнасць.

На вачах наведвальнікаў і прадаўцоў ён некалькі разоў ударыў нагамі і рукамі немаладога грамадзяніна па тулаве. У выніку на целе пацярпелага засталіся сляды пабояў. Устаноўлена, што дэбашыр знаходзіўся ў стане алкагольнага ап’янення, а гэта толькі абцяжарвае яго віну.

 

ДА ЧАГО ДАВЁЎ ПРАГРЭС

     У Багданаве зафіксавана злачынства, распрацаванае пры дапамозе сучасных тэхналогій.

Мясцовая жыхарка патэлефанавала ў РАУС і паведаміла, што яе персанальны камп’ютар заблакіраваны, а для разблакіроўкі неабходна перавесці на чужы электронны кашалёк вялікую суму грошай. Па факце віртуальнага махлярства ўзбуджана крымінальная справа.

 

Матэрыял па міліцэйскіх

зводках падрыхтавала

Алена ЗБІРЭНКА

 



Добавить комментарий