Пажарныя шукаюць, не могуць знайсці…

Общество

Летась міністрам па надзвычайных сітуацыях генерал-лейтэнантам унутранай службы У. А. Вашчанкам быў аб’яўлены конкурс “На лепшы фотаздымак аб дзейнасці органаў, падраздзяленняў і арганізацый сістэмы Міністэрства па надзвычайных сітуацыях Рэспублікі Беларусь”.

Калекцыя фотаздымкаў з удзелам супрацоўнікаў раённага аддзела МНС заўсёды вызначалася багаццем сюжэтаў, вобразаў і твараў. Найчасцей расчахляе аб’ектыў камеры інспектар групы прапаганды і навучання Алеся Радвіловіч. У верасні яна разам са сваімі калегамі прымала ўдзел у Ракаўскім фэсце нацыянальных культур. Выратавальнікі тады не толькі сачылі за бяспекай на месцы масавага гуляння, але і самі з’яўляліся аб’ектам увагі, асабліва з боку дзяцей і падлеткаў. Хлопчыкам і дзяўчынкам дазвалялася пасядзець у кабіне пажарнай машыны, разгледзець спецыяльнае абсталяванне, якое выкарыстоўваецца пры ратаванні людзей, прымераць форму выратавальніка.

Сярод юных экскурсантаў Алеся Аркадзьеўна заўважыла хлапчука ў касцюме супрацоўніка МНС. Каларытны персанаж пагадзіўся папазіраваць на фоне пажарнай машыны. Пазней гэта фота ў ліку іншых было адпраўлена на рэспубліканскі конкурс Міністэрства МНС.

Зусім нядаўна прыйшла радасная навіна: партрэт хлопчыка ў форме прызнаны лепшым у намінацыі “Выратавальнікі і дзеці”. А. А. Радвіловіч прымае віншаванні, а вось галоўны “віноўнік” пакуль што застаецца інкогніта і, хутчэй за ўсё, не ведае, што стаў зоркай фотаконкурсу. Пошукі героя, яго бацькоў ці знаёмых вядуцца па сённяшні дзень…

Алена ЗБІРЭНКА



Добавить комментарий