Рэгіянальныя навіны ад члена Беларускага саюза журналістаў Наталлі Штэйнер

    Да шматлікіх узнагарод кіраўніка Заслужанага аматарскага калектыву Рэспублікі Беларусь фальклорнага ансамбля “Гасцінец” Ракаўскага цэнтра народнай творчасці Лізаветы Станіславаўны Пятроўскай дабавілася ашчэ адна.

Не так даўно на ўрачыстай вечарыне з нагоды яе 50-годдзя дырэктар Мінскага абласнога цэнтра народнай творчасці Р. І. Вайцяхоўская ўручыла юбілярцы нагрудны знак Міністэрства культуры рэспублікі “За ўклад у развіццё культуры Беларусі”.

 

    20 мая ў Гродне прайшлі святкаванні, прысвечаныя 100-годдзю заснавання грамадскай арганізацыі “Польска Мацеж Школьна” і 25-годдзю адраджэння яе дзейнасці на Беларусі.

На ўрачыстым мерапрыемстве прысутнічалі госці з Польшчы і Літвы, дэлегацыі з розных рэгіёнаў Беларусі, дзе ёсць раённыя аддзелы. Наш раён прадстаўлялі настаўніцы польскай мовы А. Макарэвіч, В. Відзевіч і Т. Сініцкая. Пачаліся мерапрыемствы са святой імшы ў фарным касцёле. Навучэнцы ліцэя, які існуе ў Гродне пры гэтай арганізацыі, падрыхтавалі святочны канцэрт. У яго праграму былі ўключаны і іншыя нумары. Журналісты польскага радыё бралі інтэрв’ю ў прысутных. Нашым настаўнікам, як і многім іх калегам, былі ўручаны памятныя медалі і дыпломы за ўклад у асвету і прапаганду польскай мовы.

 

    З 9 па 14 ліпеня ў Польшчы пройдзе чэмпіянат свету па фехтаванні сярод людзей з захворваннямі апорна-рухальнага апарату. У складзе зборнай Беларусі на чэмпіянаце рыхтуецца выступіць выхаванка Івянецкага дзіцячага дома-інтэрната Кацярына Мышко.

Зараз у шасцікласніцы час напружанай падрыхтоўкі да адказнага старту. Яна знаходзіцца ў Маладзечанскай санаторнай школе, дзе трэнеру Іне Рамановіч прасцей праводзіць трэніроўкі. У Івянецкім доме-інтэрнаце дзяўчынка пражывае з верасня 2010 года. А да гэтага часу выхоўвалася ў Ждановіцкім спецыялізаваным дашкольным дзіцячым доме. Кацю трэнеры заўважылі на спаборніцтвах “Спешыал Алімпік”, у якіх даўно прымаюць удзел выхаванцы дома-інтэрната. Прапанавалі займацца фехтаваннем на шпагах. І праз некаторы час яна перыядычна ездзіла на зборы. Акрамя здольнасцей і працаздольнасці ў дзяўчынкі ёсць яшчэ адзін козыр: яна ляўша. ТДА “Віталюр” набыло для Каці Мышко спартыўнае абмундзіраванне коштам 500 еўра.

 

    У аграсядзіб нашага раёна добрая рэпутацыя далёка за межамі краіны. Многія з іх стварылі выдатныя ўмовы не толькі для пражывання гасцей, але і для іх разнастайнага культурнага адпачынку.

З пачатку года ў аграсядзібе “Налібоцкія васількі” пабывалі больш за 20 расіян, больш за 80 жыхароў Польшчы, наведваліся таксама прадстаўнікі Нарвегіі, Германіі, Японіі. Ганаровы консул Беларусі ў Японіі разглядаў магчымасць аздараўлення японскіх сем’яў на аграсядзібах Беларусі. Жыхары Польшчы прыязджаюць на радзіму продкаў, а гаспадар Васіль Уладзіміравіч Шакун дапамагае ім у пошуках закінутых вёсак, могілак не толькі на тэрыторыі нашага раёна, але ў суседніх – Маладзечанскім, Смаргонскім, Ашмянскім. Цікавяць палякаў і Налібоцкая пушча, пра таямніца якой гаспадар можа расказваць бясконца, і Івянец.

 

    Трэнер Арцём Барысавіч Балабан не толькі сам прыхільнік валейбола, але і стварыў каманду “Vol.k.i”, якая набірае моц і з году ў год дабіваецца лепшых вынікаў.

З 14 па 20 мая валожынская каманда ў складзе васьмі юнакоў 15-17-гадовага ўзросту прымала ўдзел у міжнародным турніры ў Польшчы. Камандзіраваны юныя спартсмены былі па лініі раённага аддзела “Польска Мацеж Школьна”. У турніры ў Аструдзе ўдзельнічалі 8 каманд з Беларусі, Украіны, Літвы, Латвіі, Расіі, гаспадары выставілі дзве каманды. “Vol.k.i” занялі ганаровае трэцяе месца і вярнуліся дадому з медалямі, кубкам, дыпломамі і новым валейбольным мячом. Сяргей Паплаўскі атрымаў прыз як лепшы ігрок каманды. Усе юнакі ў Польшчы былі ўпершыню, таму вельмі дарэчы былі экскурсіі, знаёмства з польскай культурай, музеямі, храмамі, падрыхтаваныя арганізатарамі турніру.

 

    18 мая ў Падбярэзскім сельскім Доме культуры выступалі самадзейныя артысты Дайлідскага СДК Іўеўскага раёна. А ў нядзелю, на каталіцкую Сёмуху, нашы артысты давалі канцэрт у аграгарадку Дайліды.

У праграме бралі ўдзел вакальная група народнага хору “Спяваючыя сэрцы”, салісты Падбярэзскага СДК – сямейны дуэт Святлана і Ігар Гурбаны, Людміла Вансовіч, Лілія Маразоўская. Гучалі гумарэскі, байкі ў выкананні загадчыцы аўтаклуба Антаніны Шадрынай, кіраўніка хору Галіны Філяноўскай, народныя і эстрадныя песні.

Вы можаце пакінуць каментарый або зваротную спасылку з вашага сайта.

Пакінуць каментарый


приёмная главного редактора


   
Powered by WordPress | Compare Best Sprint Phone Deals Online. | Thanks to Credit Card Deals, Best CD Rates and Sell cars