Рэгіянальныя навіны ад члена Беларускага саюза журналістаў Наталлі Штэйнер

    У мінулую суботу падчас святкавання раённых “Дажынак” у Івянцы добра папрацавалі работнікі раённага вузла паштовай сувязі. Увагу да іх кропкі прыцягвала яркая роставая лялька ў выглядзе паштовай скрыні. На раённых святах яна з’явілася ўпершыню.

    Паштавікі афармлялі падпіску на газеты і часопісы на чацвёрты квартал, гандлявалі маркіраванай і немаркіраванай прадукцыяй. Было аформлена 37 падпісных абанементаў, у асноўным на раённую газету, некалькі чалавек выпісалі “Советскую Белоруссию” і “Мінскую праўду”, іншыя выданні. Усе падпісчыкі аўтаматычна станавіліся ўдзельнікамі бяспройгрышнай латарэі.

 

    Выхаванцы Івянецкага дзіцячага дома-інтэрната прынялі ўдзел у мерапрыемствах з нагоды Дня горада, якія праходзілі ў Мінску.

    У цэнтры ля Ратушы ладзілі фэшн-спектакль удзельніцы конкурсу “Міс Беларусь”. Па запрашэнні галоўнай прыгажуні-2018 Марыі Васілевіч Кацярына Захаваева і Вадзім Стрэльскі выканалі танец “Фламенка” на інвалідных калясках. Пераможца конкурсу прадэманстравала не толькі знешнюю прыгажосць чалавека, але і душэўную. Танцоры з Івянца ў поўнай меры адлюстравалі яе задуму і атрымалі заслужаныя апладысменты гледачоў, а таксама трапілі ў тэлесюжэт са свята Мінска.

 

    На базе Мінскага рамонтна-вытворчага ўпраўлення прайшлі спаборніцтвы “Лепшая транспартная служба УП “Мінскаблгаз”-2018”, у якіх прынялі ўдзел 7 каманд з раённых падраздзяленняў.

    Перш чым каманда Валожынскага раёна газазабеспячэння ў складзе механіка Віталія Уладзіміравіча Іванчыка, вадзіцеля катэгорыі “В” Андрэя Валер’евіча Гаспарэвіча і вадзіцеля катэгорыі “С” Ігара Міхайлавіча Войткі трапіла на гэтыя спаборніцтвы, ёй давялося прайсці выпрабаванні ўнутры ВУ “Дзяржынскгаз”, у склад якога ўваходзяць. Права прыняць удзел у абласных спаборніцтвах аспрэчвалі прадстаўнікі з Валожына, Узды і Дзяржынска. Нашы землякі сталі лепшымі. На абласных спаборніцтвах яны таксама выступілі выдатна – занялі другое прызавое месца. Паказалі трывалыя тэарэтычныя веды і прадэманстравалі майстэрства ў ваджэнні машын. Узнагародай асам-прафесіяналам сталі Ганаровыя граматы і грашовая прэмія, якая будзе выплачвацца на працягу года да асноўнага заробку. Для кармільцаў сем’яў гэта вельмі добры стымул.

 

    У Валожынскім сельскагаспадарчым прафесіянальным ліцэі прайшоў традыцыйны сход, на які запрасілі першакурснікаў разам з бацькамі.

    Перад аўдыторыяй выступілі намеснік старшыні камісіі па справах непаўналетніх райвыканкама І. Л. Жданюк і начальнік інспекцыі па справах непаўналетніх РАУС А. К. Карачун. Яны пазнаёмілі навучэнцаў, большасць з якіх – іншагароднія, з крымінагеннай абстаноўкай у горадзе, правіламі паводзін у грамадскіх месцах, расказалі пра адказнасць за супрацьпраўныя дзеянні. І пажадалі ім добрай вучобы, цікавага новага жыцця і не парушаць законы.

 

    На працягу верасня ў школах раёна дэманструецца дакументальная стужка “Мы, беларусы – мірныя людзі!”.

    Гэта творчы праект майстэрні Уладзіміра Бакуна – буйнейшага ў рэспубліцы вытворцы фільмаў гістарычнай тэматыкі. 40-хвілінны фільм пра ролю і месца нашай краіны ў сучасным свеце ўжо паспелі паглядзець вучні Багданаўскай, Ракаўскай, Івянецкай сярэдніх школ. Рэалізацыя праекта працягваецца.

 

     8-9 верасня ў Маладзечне прайшлі занальныя спаборніцтвы абласной спартакіяды цэнтраў і клубаў фізкультурна-аздараўленчай работы. У іх прынялі ўдзел каманды пяці раёнаў нашай зоны.

    У праграме былі спаборніцтвы па 5 відах спорту: настольны тэніс, стрытбол, міні-футбол, валейбол (жаночы і мужчынскі). Каманда нашага раёна заняла трэцяе месца. Лепшымі былі Аляксандр Болвах і Сняжана Ланько ў настольным тэнісе, другое месца заняла каманда па стрытболе ў складзе Аляксандра Даніка, Андрэя Жамоздзіка і Ягора Каляды. Трэці вынік паказалі футбалісты.

 

    Перасовачны атракцыён 5D Мінаблкінавідэапракату з’явіўся ля кінатэатра “Юнацтва” ў цэнтры горада. Працаваць ён будзе ўключна па 17 верасня.

    Згодна з абласным графікам, у Валожыне атракцыён бывае двойчы на год. Для дзіцячай і дарослай аўдыторыі маюцца 33 фільмы на любы густ.

Вы можаце пакінуць каментарый або зваротную спасылку з вашага сайта.

Пакінуць каментарый


приёмная главного редактора


   
Powered by WordPress | Compare Best Sprint Phone Deals Online. | Thanks to Credit Card Deals, Best CD Rates and Sell cars