Рэгіянальныя навіны ад члена Беларускага саюза журналістаў Наталлі Штэйнер

    З 25 кастрычніка па 14 лістапада ў Нацыянальным дзіцячым адукацыйна-аздараўленчым цэнтры “Зубраня” знаходзяцца дзесяцікласніца гімназіі № 1 г. Валожына Марыя Малянковіч і яе равесніца з СШ № 1 райцэнтра Анастасія Шайтар.

    Дзяўчаты паехалі на змену “Робатэкс”, дзе сабраны вучні з усёй рэспублікі, якія маюць высокія дасягненні ў вучобе і цікавяцца тэхнічнай творчасцю. І на гэты раз яны правядуць час з карысцю: не толькі добра адпачнуць, набудуць сяброў, але і вернуцца ў свае навучальныя ўстановы з новымі ідэямі.

 

    21 кастрычніка ў Дубіне на базе мясцовага музея настаўніка В. Рагяля зладзілі “Восеньскі фэст”, які сабраў сяброў і добрых суседзяў. Яго арганізатарамі выступілі аматарскае аб’яднанне “Бацькаўшчына” і экасядзіба “Дайнаўскі Двор”.

    Пачаўся фэст з семінара-сустрэчы з юрыстам з Мінска Міколам Арцюховым “Віды традыцыйнай дзейнасці (рамесніцтва, асабістая падсобная гаспадарка, аграэкатурызм) як мажлівасць дадатковага прыбытку ў сельскай мясцовасці”. Яго прафесіянальныя парады былі вельмі дарэчы і самім вяскоўцам, і гаспадарам навакольных аграсядзіб, сярод якіх быў і старшыня спажывецкага кааператыва “Валожынскія гасцінцы” Васіль Грынь. У далейшым фэст працягваўся, як у даўнейшыя гады, калі людзі збіраліся разам на вячоркі. Спеўны гурт “Мярэжа” выконваў песні памежжа, музыкі гралі на народных інструментах. Выступалі Насця Шпілеўская з Маладзечна, Дар’я Зуева і Дзяніс Сухі з Мінска, гурт “Кола” з Маладзечна. Як і ў часы нашых дзядоў, вечарына праводзілася ў хаце, дзе няма электрычнасці, а падлогу палівалі вадой, каб ад танцаў не стаяў пыл гарой. Уражанняў ад фэсту надоўга хопіць і дубінскім дзецям, і дарослым рознага ўзросту, і гасцям, якія заўсёды з вялікай радасцю прыязджаюць у гэту каларытную вёску ў нашым раёне.

 

    За 10 месяцаў бягучага года ў дзіцячую бібліятэку ў Валожыне цэнтралізавана паступіла 331 новая кніга. Апошняе паступленне было на мінулым тыдні: 32 кніжкі для дзяцей і 6 новых літаратурных твораў для дарослых.

    Дзіцячыя выданні адразу выстаўляюцца на выставу “Навінкі літаратуры”, якая да канца дня была ўжо пустая. І гэта самая прыемная навіна, што нашы дзеці і ўнукі яшчэ не адвыклі ад папяровых кніжных выданняў, што іх не выжылі сучасныя гаджаты, а многія школьнікі любяць праводзіць вольны час з кнігай у руках. Сярод разабраных навінак энцыклапедычныя выданні серыі “Все на свете знают дети”, серыі “Карысныя кніжкі” для выхавальнікаў, бацькоў і дзяцей. Да кніг Жыльбера Дэлаэ, што былі на паліцах раней, дабавіліся новыя. На радасць чытачам з’явіліся і новыя кнігі англійскай пісьменніцы Холі Вэб, аўтара сучасных бестсэлераў для дзяцей і падлеткаў.

 

    Псіхолаг тэрытарыяльнага цэнтра сацыяльнага абслугоўвання насельніцтва Алена Жданюк ужо “засвяцілася” ў Валожыне з праектам “Асаблівая прыгажосць”, гераінямі якога сталі дзяўчаты з хваробай Даўна Ганна Рай і Анастасія Саўчук. Фотавыстава была прадстаўлена ў фае ДЮСШ.

    А не так даўно А. Жданюк стала ўдзельніцай фестывалю “Лэдзі Фэст”, які праходзіў у Мінску. Было пададзена каля 100 заявак, па выніках галасавання ў сацыяльных сетках журы адабрала 10. У фінал выйшлі 6 з іх. Алена прэзентавала свой праект. На жаль, у фінал яна не трапіла, выйшлі толькі тры праекты. Але, як вядома, галоўнае – не перамога, а ўдзел. Тым больш, што ўдалося дайсці да фіналу. Гэта павінна натхніць Алену на новыя творчыя праекты.

 

    20 жыхароў Валожына ў чацвер, пасля рабочага дня, пабывалі на спектаклі “Радавыя” па п’есе Аляксея Дударава ў Драматычным тэатры беларускай арміі. Паездку арганізаваў цэнтр творчасці дзяцей і моладзі.

    І хаця многія ўжо бачылі гэты спектакль ў Купалаўскім тэатры, новае яго прачытанне таксама кранула за душу. Тым больш, што ля вытокаў з’яўлення тэатра стаіць сам драматург, і, напэўна, такія “Радавыя” яму вельмі блізкія.

Вы можаце пакінуць каментарый або зваротную спасылку з вашага сайта.

Пакінуць каментарый


приёмная главного редактора


   
Powered by WordPress | Compare Best Sprint Phone Deals Online. | Thanks to Credit Card Deals, Best CD Rates and Sell cars