Рэгіянальныя навіны ад члена Беларускага саюза журналістаў Наталлі Штэйнер

Гаспадаркі раёна прыступілі да ачысткі і дапрацоўкі насення яравых зерневых і зернебабовых сельскагаспадарчых раслін пад ураджай 2019 года.

    Згодна з даведзеным заданнем, падрыхтаваць да веснавой сяўбы належыць 3405 тон насення. У кожным сельгаспрадпрыемстве ёсць свае насеннеачышчальныя машыны.

 

    У канцы кастрычніка на базе Вішнеўскага ВПК дзіцячы сад-сярэдняя школа прайшоў семінар-практыкум музычных кіраўнікоў і выхавальнікаў дашкольнай адукацыі рознаўзроставых груп дзіцячых садоў.

    Яго тэма – “Арганізацыя эфектыўнага ўзаемадзеяння ўстаноў дашкольнай адукацыі і сям’і ў пытаннях выхавання і музычнага развіцця дзяцей”. Кіраўнік метадычнага аб’яднання – музычны кіраўнік дзіцячага сада № 3 райцэнтра Жанна Феліксаўна Мянцюк.

    Выхавальніца Вішнеўскага ВПК В. С. Родзь правяла адкрытыя заняткі “Мы – таленты”, у якіх прынялі актыўны ўдзел і бацькі выхаванцаў. Па тэме семінара выступіла музычны кіраўнік ясляў-сада “Лесавічок” г. п. Івянец М. М. Цяшкевіч. Аб спецыфіцы правядзення музычных заняткаў у рознаўзроставых групах расказала музычны кіраўнік Пяршайскага ВПК Е. А. Макась. Падчас “педагагічнага моста” ўдзельнікі абмяняліся практычнымі парадамі, думкамі, выказалі свае заўвагі і меркаванні.

 

    У аптэцы, якая знаходзіцца ў райцэнтры ля Дома быту, ужо некалькі месяцаў абсталявана месца, дзе кожны наведвальнік можа памераць сабе артэрыяльны ціск. У якасці рэкламнай акцыі фірма “Сэйсімед” выдзеліла ў бясплатнае карыстанне аўтаматычны танометр маркі “Omron”.

   Таксама ўстаноўлена асобная вітрына з прадукцыяй дадзенай японскай фірмы: танометры, інгалятары, тэрмометры, глюкометры. Наведвальнікі могуць апробаваць танометр, а потым і набыць, як і іншую медтэхніку. Практычна кожны дзень некалькі чалавек скарыстоўваюць магчымасць памераць сабе ціск.

 

    На апошнім пасяджэнні прафкама РУП “Валожынскі жылкамунгас” разглядаліся некалькі пытанняў. Адно з іх – набыццё абанементаў для наведвання басейна.

    У лістападзе мяркуюць набыць да 50 абанементаў на чатыры наведванні басейна. Палову сумы аплоціць прафсаюз. Да гэтага часу, дарэчы, абанементы ў басейн не набываліся, гэта будзе пробны крок.

 

    Насычаным быў мінулы месяц для псіхолага тэрытарыяльнага цэнтра сацыяльнага абслугоўвання насельніцтва Алены Жданюк. Яна нядаўна вярнулася з Рыгі, дзе з 24 па 26 кастрычніка прымала ўдзел у міжнароднай сустрэчы і канферэнцыі, звязаных з супрацоўніцтвам недзяржаўных арганізацый з дзяржаўнымі ў праблемах людзей з інваліднасцю. А да гэтага правяла тыдзень у Капенгагене, дзе таксама збіраліся людзі, нераўнадушныя да аналагічных праблем.

    У Рызе прадстаўнікі грамадскіх арганізацый з Латвіі, Літвы, Беларусі, Расіі, Чэхіі, Даніі і іншых краін знаёміліся з вопытам супрацоўніцтва неўрадавых арганізацый з дзяржаўнымі, сацыяльнай палітыкай Латвіі, работай муніцыпалітэта Рыгі. А. Жданюк прадстаўляла нашу краіну яшчэ з адной дзяўчынай. У Капенгагене збіраліся актывісты праекта “Павестка-50”, у якім прымае ўдзел і наш раён. Госці наведалі Міністэрства сацыяльнай абароны і адукацыі, аддзяленне дзённага знаходжання для інвалідаў у адным з населеных пунктаў, майстэрні, дзе запатрабавана праца інвалідаў. Шмат карыснага прывезла Алена дадому, што магчыма ўкараніць у нашым горадзе і раёне. Але галоўнае – нават не грашовыя выдаткі, хаця без іх цяжка вырашаць праблемы, а ініцыятыва жыхароў на месцах зрабіць жыццё людзей з абмежаванымі магчымасцямі больш камфортным і разнастайным.

 

    27 кастрычніка ў спартыўнай зале ДЮСШ прайшло першынство раёна па міні-футболе сярод школьнікаў 2004-2005 гадоў нараджэння. У спаборніцтвах прынялі ўдзел 5 каманд, дзве з якіх выставіў ФАЦ Валожынскага раёна.

    Першае месца заняла каманда ФАЦ-1, другое і трэцяе – Багданаўскага ВПК і СШ № 2 райцэнтра. Камандзе-пераможцы ўручылі грашовы прыз. За лепшы гол турніру памятны кубак атрымаў Мікіта Юркевіч з гэтай каманды. Сярод удзельнікаў футбольных спаборніцтваў практычна не бывае каманд з сельскіх навучальных устаноў. Чаму? Некаторыя спасылаюцца на адсутнасць транспарту, каб даехаць у райцэнтр, у некаторых школах аддаюць прыярытэты іншым відам спорту. Хочацца думаць, што на самай справе хлопчыкі не перасталі ганяць футбольны мяч…

Вы можаце пакінуць каментарый або зваротную спасылку з вашага сайта.

Пакінуць каментарый


приёмная главного редактора


   
Powered by WordPress | Compare Best Sprint Phone Deals Online. | Thanks to Credit Card Deals, Best CD Rates and Sell cars