Каб дыягназ быў правiльным

Общество

З добрым настроем сустракае прафесійнае свята калектыў клініка-дыягнастычнай лабараторыі – аднаго з самых важных звенняў дыягнастычнай работы медыцынскіх устаноў раёна.

Сёння ў сучасным, аснашчаным высокатэхналагічным абсталяваннем, структурным падраздзяленні УАЗ “Валожынская цэнтральная раённая бальніца” выконваецца шырокі спектр даследаванняў: ад агульнаклінічнага аналізу крыві да вызначэння дыягнастычных паказчыкаў пры складаных захворваннях.

Каманда ўрачоў, фельчараў-лабарантаў, прадстаўнікоў малодшага медперсаналу пад кіраўніцтвам маладога ўрача лабараторнай дыягностыкі Юліі Васільеўны Шкуратавай робіць усё магчымае для таго, каб іх калегі розных спецыяльнасцей маглі беспамылкова вызначыць стан пацыента і назначыць адпаведнае лячэнне. У райбальніцы няма ніводнага аддзялення, работа якога б не залежала ад таго, наколькі якасна спраўляюцца са сваімі задачамі супрацоўнікі лабараторыі. У адміністрацыі заўважаюць: кваліфікацыя персаналу – на самым высокім узроўні. Іх вопыт і ўменне быць на «ты» з найноўшай апаратурай дазваляюць зменшыць тэрмін выканання аналізаў, павялічыць верагоднасць іх дакладнасці, пашырыць пералік платных паслуг для насельніцтва. Вялікім крокам наперад можна лічыць даследаванні сістэмы гемастаза, гарманальнага статусу, анкамаркераў.

У мінулым годзе праведзены капітальны рамонт усіх кабінетаў. Як адзначаюць самі медыкі, працаваць стала зручней, ды і пацыенты адчуваюць сябе больш камфортна, што разам з якасцю работы – галоўнае ў іх дзейнасці.

Былая загадчык І. В. Багданкевіч – дэлегат з’езда ўрачоў лабараторнай дыягностыкі, уладальніца Ганаровай граматы Міністэрства аховы здароўя – прысвяціла даследчай медыцынскай дзейнасці 42 гады. Ірына Васільеўна падзялілася думкай: “Раней даводзілася многія работы выконваць літаральна ўручную, зараз жа якаснае, дарагое абсталяванне з сучаснымі рэактывамі ў многім спрашчае работу. Прычым гэта ні ў якім разе не зніжае нашу адказнасць за вынік”.

Персанал лабараторыі – не вялікі, але дружны калектыў высокакваліфікаваных прафесіяналаў-аднадумцаў, пра што сведчаць выдатныя паказчыкі, адсутнасць цякучкі кадраў, узаемная павага і добразычлівасць. Дарэчы, паколькі лабараторныя работы праводзяцца штодзённа, у тым ліку і ў выхадныя дні (хто ведае, калі і ў якім з аддзяленняў узнікне патрэба ў тэрміновых аналізах), наладжана дзяжурства па зменах, а гэта азначае 100-працэнтную замяняльнасць. “Мы ўсе ўмеем усё”, – сцвярджаюць сур’ёзныя, але неверагодна прыгожыя, ветлівыя і ўсмешлівыя жанчыны, на чыіх плячах – адказнасць за здароўе і жыцці людзей.

Валянціна КРАЎНЕВІЧ, фота аўтара

На здымку: калектыў клініка-дыягнастычнай лабараторыі Валожынскай ЦРБ Ірына Міхайлаўна КЛІМОВІЧ, Ала Яўгенаўна МОШКА, Юлія Васільеўна ШКУРАТАВА, Эла Юльянаўна СТАСЯЛОВІЧ, Ірына Васільеўна БАГДАНКЕВІЧ, Наталля Паўлаўна ІОШЫНА.



Добавить комментарий

Ваш адрес email не будет опубликован. Обязательные поля помечены *