События прошедшей недели

Общество

«Дзяржаўтаінспекцыі – 75!» Пад такой назвай прайшлі 7-я абласныя гульні сярод каманд вясёлых і знаходлівых Юных інспектараў дарожнага руху. У конкурсе ўдзельнічалі каманды па 12 чалавек да 17 гадоў. Вучні Івянецкай СШ занялі трэцяе месца. Пераможцы атрымалі права ўдзельнічаць у фінале конкурсу, які адбудзецца ў рамках 39-га абласнога злёту ЮІД у дзіцячым лагеры «Зубраня».

***

За апошнія два тыдні машынны парк ДУП “Аўтапарк № 14” папоўніўся 6 новымі МАЗамі 20-тоннікамі. Пакупка тэхнікі абышлася прадпрыемству ў 1 мільярд 300 мільёнаў рублёў крэдытных сродкаў. Але магутныя прыгажуны апраўдаюць сваю цану: павышаны аб’ём кузава дазволіць павялічыць грузаперавозкі і знізіць транспартныя расходы ў цэлым.

***

На абласным конкурсе “Лепшая сувенірная работа сярод кіраўнікоў гурткоў” Наталля Аляксандраўна Перападзя, кіраўнік гуртка “Творчая майстэрня” раённага Цэнтра дзіцячай творчасці, за выраб, валены з воўны, “Калядны чаравічак з гасцінцамі” ўзнагароджана дыпломам першай ступені ў намінацыі “Арыгінальная тэхніка”.

***

Падведзены вынікі работы за мінулы год прадпрыемстваў кіна- і відэапракату вобласці. Да ўвагі бралася тэхнічная характарыстыка кінатэатраў, якасць і колькасць выканання платных паслуг насельніцтву. Валожынскі філіял КУП “Мінскаблкінавідэапракат” заняў другое месца, саступіўшы толькі калегам з Барысава.

***

Вынікі абласной выставы-конкурсу выяўленчай і дэкаратыўна-прыкладной творчасці “Скарбонка талентаў”, якая стартавала ў лістападзе мінулага года, падвялі ў красавіку. 13 дыпломаў, чатыры з якіх I ступені, атрымалі юныя мастакі з Валожынскага Цэнтра і Івянецкага Дома дзіцячай творчасці. Майстэрства наведвальнікаў апошняга асабліва адзначыла журы.

***

47 дзяцей, якія вывучаюць польскую мову пры івянецкім гарпасялковым аддзеле ГА “Саюз палякаў на Беларусі”(сярод іх і дзеці з малазабяспечаных і нядобранадзейных сем’яў), пабывалі ў Гродзенскім аквапарку. Забавы на сучасных водных атракцыёнах, спецыяльна адаптаваныя для такога ўзросту басейны задаволілі самыя патрабавальныя густы юных аматараў водных працэдур.

***

За чатыры месяцы да адміністрацыйнай адказнасці прыцягнуты 88 жыхароў раёна, якія знаходзіліся на рабочым месцы ў стане алкагольнага ап’янення. З мэтай прадухілення распаўсюджвання п’янства, асабліва сярод тых, хто схільны да рэцыдыўнай злачынасці, РАУС правёў комплекснае мерапрыемства “Нагляд”.



Добавить комментарий