Рэгiянальныя навiны

Региональные новости

У 2020 годзе прынята рашэнне райвыканкамаАб датэрміновым распараджэнні сродкамі сямейнага капіталу”.

З такой просьбай за першы квартал у райвыканкам ужо звярнуліся 19 сем’яў. 14 чалавек атрымалі дазвол. Пяці сем’ям адмоўлена ў датэрміновым выкарыстанні гэтых грошай.

 

Працягваюцца рамонтныя работы на чацвёртым паверсе раённай паліклінікі.

У мінулым годзе тут былі адрамантаваны некалькі кабінетаў аддзялення стаматалогіі. Цяпер рамонтнікі перамясціліся ў калідор. Неўзабаве ў належны выгляд будуць прыведзены сцены і столь.

 

Каманда лясгаса традыцыйна прыняла ўдзел у інтэлектуальнай гульні “Што? Дзе? Калі?”, якая праводзіцца штогод па ініцыятыве галіновага прафсаюза. Праходзіла гульня 13 сакавіка ў Мінскім Палацы моладзі. Капітан каманды – намеснік дырэктара па ідэалагічнай рабоце Сяргей Мікеня.

Вынік не вельмі абрадаваў знаўцаў: 13-е месца з 21. Але на гэта можна паглядзець па-рознаму. У апошні час у прафсаюз уліліся шмат новых арганізацый галіны прыродакарыстання, і ён стаў называцца прафсаюзам работнікаў лесу і прыродакарыстання. А ў складзе апошніх не толькі арганізацыі, але і навукова-даследчыя інстытуты. Натуральна, яны выставілі каманды, у якіх было шмат навуковай моладзі. Калі б падводзіліся вынікі ў некалькіх намінацыях, то сярод лясгасаў прадстаўнікі нашай каманды былі б лепшымі. Праверыць свае сілы і разумовыя здольнасці таксама не пашкодзіла. Можна паглядзець на вынікі і з гумарам: гульня праходзіла ў пятніцу, 13-га.

 

У першай дэкадзе сакавіка фонд раённай бібліятэкі папоўніўся на 30 экзэмпляраў новых кніг. Гэта ўжо трэцяе паступленне менавіта мастацкай літаратуры з пачатку года.

Сярод кніжных навінак новыя выданні Таццяны Усцінавай, Алены Арсеньевай, Алега Роя, Сцівена Кінга і іншых папулярных аўтараў, кнігі якіх не залежваюцца на паліцах.

 

Пасля правядзення неабходных мытных працэдур кіраўніцтва прытулку для старых людзей “Сямейны прычал”, што размяшчаецца ў вёсцы Вайганы, пачало раздаваць гуманітарны груз, дастаўлены з Галандыі. Значную частку пакінулі сваім падапечным, астатні перадалі ўстановам раёна і жыхарам Валожыншчыны, якія маюць у гэтым патрэбу.

Неабходную колькасць супрацьпролежневых матрацаў, памперсаў, пасцельнай бялізны, падушак пакінулі для сваіх насельнікаў. Усім работнікам дасталіся хуткасныя веласіпеды – самы зручны сродак перамяшчэння ва ўмовах сельскіх населеных пунктаў. Для дзяцей персаналу скамплектавалі 40 падарункавых набораў, куды ў асноўным увайшлі канцылярскія прылады. Раённай бальніцы перададзены 4 шматфункцыянальныя ложкі, інвалідныя каляскі, хадункі і стуллі для туалета. Па просьбе Багданаўскага святара для прыхаджан-інвалідаў адпраўлены 2 інвалідныя каляскі, хадункі і стуллі. Абнавілася мэбля ў адным з кабінетаў цэнтра творчасці дзяцей і моладзі ў Валожыне, куды дастаўлены 10 сталоў і 10 стулляў. Адзенне, абутак і нават посуд атрымалі мнагадзетныя сем’і, інваліды, малазабяспечаныя жыхары многіх населеных пунктаў Вішнеўскага сельсавета.

 

Выстава малюнкаўНад Валмянкайнекалішняга жыхара вёскі Пагарэлка Ксаверыя Сухоцкага пераехала з Польскага Дома ў Івянцы на яго малую радзіму.

Цяпер работы выстаўлены ў Сівіцкай бібліятэцы-клубе. З імі могуць азнаёміцца землякі самадзейнага мастака. Большую частку свайго жыцця К. Сухоцкі пражыў у Польшчы, працаваў на чыгунцы. Але краявіды дзяцінства, якія засталіся ва ўспамінах, мусілі яго стаць мастаком. Цяперашнім жыхарам цікава будзе параўнаць карціны з мінулага з сённяшнімі выявамі. Дарэчы, у Пагарэлцы захаваўся дом, дзе нарадзіўся мастак, жывуць яго сваякі.

 

Першы ў бягучым годзе груз у выглядзе карысных ёгуртаў з пратэінамі фірмыДанонатрымала Таварыства Чырвонага Крыжа. На мінулым тыдні сюды паступілі 3780 штук ёгуртаў з рознымі напаўняльнікамі на суму 5 тысяч 481 рубель.

Карысныя ласункі атрымалі 198 жыхароў раёна, якія пражываюць у Валожыне, Івянцы і вясковых населеных пунктах. Сярод іх 87 дарослых і дзяцей-інвалідаў, 65 мнагадзетных сем’яў, 42 адзінокія пажылыя, ёсць таксама дзеці з няпоўных сем’яў і тыя, што знаходзяцца на апецы.