Рэгіянальныя навіны

Региональные новости

У ліпені ў раёне папоўніліся рады шматдзетных сем’яў. На двух пасяджэннях райвыканкама разглядаліся пытанні аб прызначэнні сямейнага капіталу.

Права на сямейны капітал атрымалі ажно дзесяць сем’яў, дзе ў пераважнай большасці нарадзілася трэцяе дзіця. І толькі Марына Мікалаеўна Равяка з вёскі Паморшчына нарадзіла чацвёртае дзіця. Сямейны капітал налічаны Алесі Мікалаеўне Сівай і Вераніцы Генадзьеўне Палянскай з Валожына, Марыі Львоўне Рэзнік і Вользе Вацлаваўне Чапёлка з Івянца, Вікторыі Мікалаеўне Тарасік і Дар’і Ігараўне Стасілевіч з Ракава, Алене Рамуальдаўне Глябовіч з вёскі Пральнікі, Вадзіму Уладзіміравічу Вашкевічу і Настассі Мікалаеўне Літвін з вёсак Паморшчына і Ганчары Валожынскага сельсавета.

 

 

Прафсаюзны камітэт РУП “Валожынскі жылкамунгас” прыняў рашэнне аб выдзяленні грашовай дапамогі членам прафсаюза, дзеці якіх пойдуць у першы клас.

Такіх дзяцей сёлета аказалася ўсяго 7 чалавек, трое з іх выхоўваюцца ў мнагадзетных сем’ях. У першай дэкадзе жніўня на кожнага будучага першакласніка пералічаны па дзве базавыя велічыні – 54 рублі. Дарэчы, такую матэрыяльную падтрымку прафсаюз аказвае не першы год. Але летась першакласнікаў было ўдвая больш, і таму выдаткоўвалі па адной базавай.

 

 

28 ліпеня ў Слуцку адбылося пасяджэнне савета Мінскай абласной арганізацыі грамадскага аб’яднання “Беларускі саюз афіцэраў”, на якім былі падведзены вынікі работы за першае паўгоддзе.

    За актыўную работу па патрыятычным выхаванні моладзі і ў сувязі з 75-годдзем Перамогі савецкага народа ў Вялікай Айчыннай вайне ў ліку лепшых арганізацый вобласці была названа і валожынская, якую ўзначальвае палкоўнік у адстаўцы Аляксандр Валавікоў. Арганізацыя ўзнагароджана вымпелам з уручэннем пасведчання і памятным сувенірам.

 

 

 

У ліпені ў вёсцы Масцішча Вішнеўскага сельсавета і яе ваколіцах беларускія кінематаграфісты здымалі мастацкі фільм пра падзеі мінуўшчыны.

На працягу тыдня члены здымачнай групы пражывалі на аграсядзібе “Бацян”, дзе гаспадары Таццяна і Уладзімір Бацяны стварылі ўсе ўмовы для іх адпачынку пасля напружанага дня.

 

 

Пачынаючы з канца ліпеня, Івянецкі музей традыцыйнай культуры ў сацыяльных сетках расказвае пра артэфакты, якія знаходзяцца ў яго фондах.

Першы цыкл быў прысвечаны драўляным скульптурам, што раней упрыгожвалі ўніяцкія храмы. Такіх скульптур у музеі тры, адна з іх, дарэчы, – Чорт. Усяго падрыхтавалі і запусцілі ў сеткі 10 цыклаў. Яны расказваюць пра разьбу па дрэве, мэблю, кафлю, ткацтва, цацкі-свістулькі, кераміку, у тым ліку і знакамітую івянецкую фляндроўку, плеценыя вырабы, разнастайныя букетніцы, вырабы 60-х гадоў мінулага стагоддзя. Інфармацыя пра незвычайныя экспанаты падмацоўваецца шматлікімі фатаграфіямі. Дадзены праект распрацаваны з мэтай далучэння землякоў да музейнага мастацтва, пашырэння кругагляду. Музейныя работнікі таксама аб’явілі фотаконкурс і прапанавалі дасылаць фота з залаў Івянецкага музея. Прызам пераможцу стане ганчарны выраб мясцовых майстроў.

 

 

Пасля значнага перапынку аднавіў сваю работу басейн у райцэнтры.

Аматары плавання не маглі дачакацца гэтага моманту. 1 жніўня яго наведалі 45 чалавек, а 2-га ўжо 54. І далей лічбы наведвальнікаў пайшлі па нарастаючай.

 

 

У Валожынскай дзіцячай бібліятэцы пачало працаваць бібліякафэ. Але наведвальнікам прапануюць не разнастайныя стравы: “Смачнае меню” складаецца… з кніг.

Так, тут кнігі можна паспрабаваць на смак. Ежу для розуму і душы прапануюць бібліятэкары чытачам рознага ўзросту. Бібліякафэ разгарнулася ў чытальнай зале. Кнігі новыя, маляўнічыя і вельмі цікавыя. Адкрывае экспазіцыю выставы-прагляду “Бізнес-ланч” – інфармацыйны сняданак дзелавога чалавека (агляд свежых газет і часопісаў). Стравы нацыянальнай кухні – гэта новыя творы беларускіх аўтараў і класікаў нацыянальнай літаратуры. Пад вострым соусам падаюцца новыя творы дэтэктыўнага і прыгодніцкага жанраў. Увагу падлеткаў прыцягвае “Марское асарці”. А ўвогуле, лепш адзін раз прыйсці ў бібліятэку, каб усё ўбачыць на свае вочы і нават пакаштаваць некаторыя “стравы”. Дарэчы, кожны гастранамічны раздзел тэматычна аформлены, над чым з фантазіяй і выдумкай папрацавалі работнікі ўстановы.