Першую электраэнергію на БелАЭС плануецца выпрацаваць да лістапада

Важное

Плануецца, што да лістапада на БелАЭС будзе выпрацавана першая электраэнергія. Аб гэтым расказаў у інтэрв’ю газеце «Рэспубліка» намеснік міністра энергетыкі Міхаіл Міхадзюк.

«Работы вядуцца па графіку. Пры гэтым бяспека для нас галоўны прыярытэт. Ніякай спешкі, усё выконваецца згодна з рэгламентам, пад кантролем Дзяржатамнагляду. Ідзе падрыхтоўка да вываду рэактарнай устаноўкі на мінімальна кантралюемы ўзровень магутнасці. Наступны этап — энергетычны пуск з уключэннем энергаблока ў энергасістэму краіны. Плануецца, што да лістапада на БелАЭС будуць выпрацаваны першыя кілават-гадзіны», — сказаў Міхаіл Міхадзюк.

Паводле яго слоў, паралельна прадаўжаюцца работы па інтэграцыі БелАЭС у энергасістэму краіны. Гэта будаўніцтва 800 МВт высокаманеўраных пікава-рэзервовых крыніц і ўзвядзенне на вялікіх электрастанцыях і кацельнях электракатлоў сумарнай магутнасцю 916 МВт. Рэалізаваны праекты па будаўніцтве і рэканструкцыі 1700 км высакавольтных ліній электраперадачы, што дае магчымацсь забяспечыць пастаўку электраэнергіі са станцыі ў любы рэгіён краіны.

Таксама намеснік міністра расказаў, што праектныя рашэнні па схеме выдачы магутнасці БелАЭС прыняты з улікам магчымай адсутнасці электрычных сувязей з энергасістэмай Літвы. «У выпадку развіцця сцэнарыя з адключэннем міждзяржаўных паветраных ліній электраперадачы паміж краінамі з моманту ўключэння ў работу першага энергаблока БелАЭС надзейнасць работы аб’яднанай энергасістэмы Беларусі будзе забяспечана з улікам існуючых паветраных ліній з Расіяй і Украінай. З улікам узводзімых пікава-рэзервовых крыніц і электракатлоў», — растлумачыў ён.

Што датычыцца экспарту электраэнергіі, цяпер прапрацоўваюцца розныя варыянты, вядуцца адпаведныя перагаворы з патэнцыяльнымі партнёрамі, аднак аб дэталях гаварыць пакуль рана. «Упэўнены, што з уводам АЭС Беларуская электраэнергія стане яшчэ больш канкурэнтаздольнай на замежных рынках. Эканоміка расставіць з часам усё па сваіх месцах. Гэта вышэй за палітычныя амбіцыі», — дадаў Міхаіл Міхадзюк.