Новы дзіцячы садок у Івянцы адкрыўся: сімвалічную стужку перарэзаў кіраўнік Міншчыны Аляксандр Турчын

Главное Общество Официально

Сімвалічны ключ ад установы ўручыў калектыву генеральны дырэктар ААТ «Палессежылбуд» Сяргей Лаўнік. Запаветная мара івянчан, якую жыхары гарпасёлка чакалі амаль 10 гадоў, збылася!

Дзіцячы сад, а дакладней – дашкольны цэнтр развіцця дзіцяці на 230 месцаў абышоўся рэспубліканскаму і абласному бюджэтам у 10,4 мільёна рублёў. Як адзначыў старшыня Мінаблвыканкама, гэта інвестыцыі ў нашу агульную будучыню, на якіх эканоміць нельга.

Новая ўстанова адукацыі адпавядае ўсім сучасным патрабаванням. У рабоце будуць задзейнічаны 24 педагогі. Ужо сфарміраваны 11 груп дзетак. 222 малышы ў хуткім часе пачнуць актыўна і з вялікім задавальненнем рыхтавацца да школы.

У цэнтры развіцця дзіцяці створаны ўмовы для ўсебаковага развіцця дашкольнікаў. Малышы будуць займацца ў фізкультурным, трэнажорным, музычным, харэаграфічным залах, а таксама наведваць басейн. Для іх аснашчаны камп’ютарны клас, кабінеты настаўніка-дэфектолага і педагога-псіхолага. Тут арганізавана работа пункта карэкцыйна-педагагічнай дапамогі, функцыянуе сэнсарны пакой, студыя канструявання, цэнтр пазнавальнага развіцця, арт-студыя, падрыхтаваны памяшканні для адаптацыйнай групы, лаунж-зона для выхаванцаў. А для педагогаў створаны рэсурсныя і інфармацыйна-метадычны цэнтры. У двары ўстановы – гульнявыя пляцоўкі з верандамі і ценявымі навесамі, а таксама агульная фізкультурная пляцоўка і пляцоўка для вывучэння Правіл дарожнага руху. Ва ўстанове тэхналагічна абсталяваныя на сучасным узроўні харчаблок і медыцынскі пакой. Таксама тут прадугледжаны ўмовы для аказання шырокага спектра дадатковых адукацыйных паслуг.

Новая дашкольная ўстанова – сапраўдны падарунак ад дзяржавы для Івянца і ўсёй Валожыншчыны ў цэлым. Сёння ў гарадскім пасёлку сем’і выхоўваюць 332 дашкольнікаў. Да верасня адзіны на ўвесь населены пункт дзіцячы сад размяшчаўся ў будынку 1938 года, які даўно і безнадзейна састарэў і перастаў адпавядаць цэламу комплексу нормаў. Новы садок, згодна з Праграмай развіцця сістэмы дашкольнай адукацыі, было запланавана пабудаваць яшчэ ў 2012 годзе, аднак па шэрагу прычын да ўзвядзення гмахаў так і не прыступілі.

Актыўныя работы ў гэтым кірунку пачаліся ў снежні мінулага года. Надворныя ўмовы не перашкаджалі весці будоўлю, і генеральная падрадная арганізацыя (ААТ «Палессежылбуд») не толькі справілася з заказам, але і апярэдзіла графік здачы аб’екта. Цяпер і самі івянчане, і жыхары блізкіх населеных пунктаў могуць засппакоіцца: іх дзеткі будуць займацца ў выдатных, камфортных умовах, а месцаў, напэўна, цяпер хопіць усім жадаючым.

Тэкст і фота Сяргея САДОЎСКАГА