Фінансавая пісьменнасць

Молодежный курьер Ступені поспеху

На базе Мінскага абласнога інстытута развіцця адукацыі адбыўся абласны этап рэспубліканскай алімпіяды па фінансавай пісьменнасці сярод вучняў устаноў агульнай сярэдняй адукацыі.

Мерапрыемства праводзіцца па сумеснай ініцыятыве Нацыянальнага банка і Міністэрства адукацыі. Сёлета ў першым этапе алімпіяды прынялі ўдзел больш за 4 тыс. вучняў сталічнага рэгіёну з 378 устаноў адукацыі. У другім этапе фінансавыя веды прадэманстравалі 558 школьнікаў. Нарэшце, на трэці абласны этап завіталі 70 дзяцей-пераможцаў раённых этапаў. З імі прыехалі 30 педагогаў. Рабяты змагаліся за права прадстаўляць цэнтральны рэгіён на рэспубліцы.

  Удзельнікам абласнога этапу неабходна было выканаць 31 заданне. 30 з іх былі з варыянтамі адказаў і адно адкрытага тыпу. Кожнаму прэтэндэнту на перамогу неабходна было выказаць уласны пункт гледжання, а таксама абгрунтаваць вывады.

Прыемна, што другое месца ў вобласці заваяваў адзінаццацікласнік гімназіі № 1 г. Валожына Андрэй Лушноў. Рыхтавала юнака да спаборніцтваў настаўнік гісторыі Ірына Мечыславаўна Рыцікава. Школьнік прызнаецца, што такі вынік стаў для яго нечаканым. У мінулым годзе яму не пашчасціла заняць прызавое месца, а сёлета ўсё ўдалося. Пытанні былі нескладаныя, але ёсць тэмы, якія неабходна падцягнуць, напрыклад, падаткі, страхаванне. Былі цікавыя задачы пра ўклады, пра віды махлярства, па акцыях. Андрэю падабаецца паглыбляцца ў тэму фінансавай пісьменнасці. Найбольш цікавіць функцыянаванне банкаўскай сістэмы, у прыватнасці, узаемадзеянне Нацыянальнага банка з іншымі банкамі. Магчыма, хлопец і будучую спецыяльнасць звяжа з гэтай сферай.

 Перамога ж дасталася адзінаццацікласніцы Дзіяне Бабіцкай са Смалявічаў. Тройку ж мацнейшых замкнуў  дзесяцікласнік Яўген Богдан са Стаўбцоўскага раёна.

 Прызёры абласнога этапу атрымалі дыпломы і памятныя падарункі. Менавіта яны прадставяць Мінскую вобласць на заключным этапе рэспубліканскай алімпіяды, які пройдзе 18 снежня ў Нацыянальным банку Рэспублікі Беларусь.

Наш кар.