Аргкамітэт Усебеларускага народнага сходу ўжо атрымаў 17 тыс. прапаноў

VI Усебеларускі народны сход

Аргкамітэт Усебеларускага народнага сходу ўжо атрымаў 17 тыс. прапаноў, паведаміў намеснік кіраўніка Адміністрацыі Прэзідэнта Беларусі Андрэй Кунцэвіч у інтэрв’ю праграме «Контуры» на тэлеканале АНТ. Як  паведамляе БЕЛТА.

«Усяго ў арганізацыйны камітэт паступіла ўжо 17 тыс. прапаноў, якія цяпер абагульняюцца. Я лічу, што па выніках выбрання дэлегатаў і іх работы ў сябе ў рэгіёнах, на месцах, мы таксама атрымаем значны пералік прапаноў, якія дадуць нам магчымасць у канчатковым выніку сфарміраваць вобраз Беларусі будучыні», — адзначыў Андрэй Кунцэвіч.

Ён нагадаў, што звароты прымаюцца ў тым ліку праз сайт УНС vsebel.by: «Дарэчы, на сайт сходу паступілі ўжо сотні паведамленняў — ад мясцовай праблематыкі да пытанняў агульнадзяржаўнага ўзроўню».

Намеснік кіраўніка АП лічыць, што Усебеларускі народны сход павінен адказаць на сённяшнія запатрабаванні грамадства. «Прычым не толькі (на запатрабаванні. — Заўвага БЕЛТА) тых, хто пражывае ў сталіцы. Маё цвёрдае перакананне, што сапраўды моцнай нашу краіну робяць толькі моцныя рэгіёны. Таму я лічу, што адным з прыярытэтаў новай пяцігодкі павінна стаць рэгіянальнае развіццё. Безумоўна, ужо нямала робіцца ў гэтым напрамку, але трэба рухацца далей, шукаць нейкія новыя пункты росту», — сказаў ён.

Андрэй Кунцэвіч таксама выказаўся за далейшую дэбюракратызацыю дзяржапарату. «Чаго граху таіць — ёсць прыклады, калі, скажам так, некампетэнтнасць або хамства асобных чыноўнікаў перакрэслівае намаганні цэлых органаў дзяржаўнага кіравання», — канстатаваў ён.

Паводле слоў намесніка кіраўніка АП, сярод дэлегатаў УНС — самыя розныя людзі па сваёй прафесійнай прыналежнасці, узросце, узроўні адукацыі, поглядах на прыярытэты дзяржаўнай палітыкі. «Лічу, што менавіта гэта разнастайнасць дасць нам магчымасць знайсці правільны вектар развіцця краіны. І, галоўнае, ёсць адчуванне таго, што для іх Беларусь — гэта не гульня ў «Манаполію». Яны цвёрда разумеюць, што краіна — гэта не пра катлеты і не пра стужачкі, краіна — гэта пра лёсы людзей, лёсы іх дзяцей і ўнукаў», — сказаў Андрэй Кунцэвіч.