Дэлегат УНС: падтрымка інстытута сям’і і дзяцей — адзін з важных аспектаў развіцця краіны

VI Усебеларускі народны сход

Падтрымка інстытута сям’і і дзяцей — адзін з важных аспектаў развіцця краіны ў будучым. Такім меркаваннем з карэспандэнтам БЕЛТА падзялілася дэлегат VI Усебеларускага народнага сходу, повар Ржаўскага вучэбна-педагагічнага комплексу «Дзіцячы сад — базавая школа» Слаўгарадскага раёна і шматдзетная маці Аксана Дзянісава, каменціруючы праект праграмы сацыяльна-эканамічнага развіцця да 2025 года.

«Цяпер мы бачым, што ў нашай краіне ўдзяляюць вялікую ўвагу шматдзетным сем’ям. Вядома, хацелася б, каб у будучым наша краіна захавала сваю сацыяльную накіраванасць. Таму што падтрымка інстытута сям’і, дзяцей — важны аспект развіцця ўсёй краіны ў цэлым, — адзначыла Аксана Дзянісава. — У шчаслівых сем’ях выхоўваюцца шчаслівыя і паспяховыя дзеці. У нас ёсць магчымасць даць ім добрую адукацыю, ёсць усё неабходнае для раскрыцця творчага патэнцыялу. Усе гэта сведчыць аб тым, што ў будучым яны стануць надзейнай апорай для нашай краіны. А гэта — непасрэдны ўдзел і ў эканамічным жыцці дзяржавы».

Аксана Дзянісава — чалавек з актыўнай жыццёвай пазіцыяй. Яны з мужам выхоўваюць траіх дзяцей. Ужо тры гады яна стараста ў родным аграгарадку Ржаўка Слаўгарадскага раёна і другі тэрмін — дэпутат гэтай жа акругі. Да таго, як стала поварам, шмат гадоў працавала ў Ржаўскім сацыяльна-культурным цэнтры. «У сваёй рабоце я сустракаюся з людзьмі і бачу, з якімі праблемамі і пытаннямі яны сутыкаюцца ў звычайным жыцці. Многае ўдаецца вырашаць на месцах — вялікую падтрымку і дапамогу аказваюць сельсавет, адміністрацыя Слаўгарадскага раёна. У такой сумеснай рабоце нам удаецца рабіць жыццё нашых грамадзян лепшым, — адзначыла дэлегат. — Быць дэлегатам на Усебеларускім народным сходзем — хвалююча і адказна. Гэта сведчыць аб тым, што людзі даверылі мне права прадстаўляць іх інтарэсы. І іх нельга падводзіць».

Паводле яе слоў, яшчэ адно важнае пытанне, якое неабходна прапрацаваць, — падтрымка на належным узроўні жыцця людзей у невялікіх населеных пунктах. «Апошнім часам мы бачым, што людзі выязджаюць з вёсак і аграгарадкоў у большыя горады. І каб гэтага пазбегнуць, трэба ствараць для людзей камфортныя ўмовы жыцця на месцах — патрэбны магазіны, дамы быту і іншае. Гэта дапаможа людзям замацоўвацца на месцах, ствараць сем’і, жыць і развівацца ў невялікіх населеных пунктах», — падкрэсліла Аксана Дзянісава.

Каменціруючы мэты і прыярытэты развіцця Беларусі на бліжэйшую пяцігодку, Аксана Дзянісава адзначыла комплексны падыход да будучага краіны. «Мы бачым, што ў распрацоўцы стратэгіі развіцця Беларусі ўлічваюцца ўсе аспекты жыцця. Паколькі для таго, каб забяспечваць сацыяльную стабільнасць у краіне, неабходна мець развітую эканоміку. І я ўпэўнена, што ў Беларусі створаны надзейны фундамент, у аснове якога знаходзяцца лепшыя дасягненні дзяржавы за гады яе існавання, — падкрэсліла дэлегат. — Нам трэба не толькі захаваць усё гэта, але і прымножыць. І ў такой рабоце важны ўклад кожнага чалавека».