Рэгіянальныя навіны ад члена Беларускага саюза журналістаў Наталлі ШТЭЙНЕР

Без рубрики Региональные новости

Традыцыйна ва ўсіх паляўнічых угоддзях рэспублікі праводзіцца зімовы ўлік дзікіх жывёл. Дзякуючы вялікаму снежнаму покрыву, сёлета правесці яго можна больш дасканала, выкарыстоўваючы маршрутныя ўлікі.

У маршрутным уліку дзікіх насельнікаў на тэрыторыі Рэспубліканскага ландшафтнага заказніка “Налібоцкі” прымалі ўдзел, акрамя штатных работнікаў, 7 супрацоўнікаў Навукова-практычнага цэнтра Нацыянальнай акадэміі навук па біярэсурсах. На гэта ім спатрэбілася каля трох дзён.

Лепшым школьнікам раёна па-ранейшаму за гонар атрымаць пуцёўку ў Нацыянальны дзіцячы адукацыйна-аздараўленчы цэнтр “Зубраня”. Вось і ў лютым адразу некалькі школьнікаў пачалі вучобу ў гэтым цэнтры.

3 лютага на змену “Маладзёжны бум” адправіліся тры васьмікласніцы Ракаўскай сярэдняй школы. Кацярына Вяршыцкая, Юлія Мякіннік і Кацярына Свірыдава актыўныя ўдзельніцы школьнай бізнес-кампаніі. А вучаніца 7 класа сярэдняй школы № 1 райцэнтра Марыя Гаспарэвіч з 4 лютага папраўляе здароўе ў санаторна-аздараўленчым атрадзе, які таксама ёсць у “Зубраняці”.

Для зручнай работы гуртка па камп’ютарнай адукаванасці і паліграфіі ў аддзяленні дзённага знаходжання інвалідаў тэрытарыяльнага цэнтра сацыяльнага абслугоўвання насельніцтва была заказана спецыяльная мэбля на прадпрыемстве “Мэбля Леў” у Валожыне.

Заказ быў выкананы хутка, і тумба пад прынтар, стол, тумбы для папер дастаўлены ў аддзяленне.

Сапраўдная зіма з вялікім снежным покрывам стала нечаканасцю не толькі для людзей. Асабліва ад гэтага церпяць жывёлы і птушкі. Вешаць кармушкі і цешыць вока, калі птушкі прылятаюць харчавацца, назіраць за іх паводзінамі, мы яшчэ не развучыліся. А вось у дашкольных установах раёна аб’яўлена акцыя ў дапамогу птушкам. У выхаваўчым працэсе яна займае пэўнае месца, бо вучыць дабрыні, клопату аб сябрах нашых меншых.

У дзіцячым садку № 6 “Вясёлы вулей” вырабілі і развесілі па тэрыторыі каля 10 кармушак, а дзеці разам з выхавальнікамі старанна сочаць, каб яны заўсёды былі напоўнены кормам. Выхавальнік дашкольнай адукацыі Вольга Уладзіміраўна Зянюк правяла майстар-клас па вырабе кармушкі і размясціла яго ў сацыяльных сетках. У гэтай установе створана скарбонка загадак пра птушак, прайшла выстава дзіцячых малюнкаў “Птушкі на галінцы”. А яшчэ тут распрацавалі і выдалі спецыяльны буклет, як дапамагчы птушкам зімой. У дашкольным цэнтры развіцця дзіцяці “Расінка” выхаванцы старэйшай групы “Пчолкі” актыўна ўдзельнічалі ў вырабе кармушак сваімі рукамі з пластыкавых бутэлек і ўпаковак з-пад сокаў. Некаторыя разам з бацькамі вырабілі больш даўгавечныя і практычныя драўляныя кармушкі. Устаноўлены дзяжурствы ля птушыных сталовак, развешаных на ўчастках, замацаваных за групамі. Выхаванцы добра ведаюць, што павінна ўваходзіць у меню, а што нельга даваць птушкам.

З 2 лютага па 11 сакавіка праводзіцца анлайн навучальны курс “Стоп гвалтаванне!”. Ініцыятарам яго правядзення стала Беларуская асацыяцыя дапамогі дзецям-інвалідам і маладым інвалідам”.

Да 18 лютага па аўторках і чацвяргах у занятках удзельнічаюць дзве выхаванкі нашага аддзялення дзённага знаходжання для інвалідаў – Алена Кароль і Ларыса Радзівіла. Тэмы разглядаюцца наступныя: хто такія гвалтаўнікі, якія бываюць віды гвалтавання, куды звяртацца ў выпадку згвалтавання і іншыя. Пасля навучання дзяўчат аналагічны курс будзе праводзіцца для мужчынскай часткі прадстаўнікоў аддзялення.

У першынстве раёна па шахматах сярод юнакоў і дзяўчат 2007-2008 гадоў нараджэння прынялі ўдзел 14 каманд устаноў адукацыі.

Дзіўна, але на гэты раз сярод пераможцаў няма прадстаўнікоў гарадскіх школ. Першае месца заняла каманда Багданаўскага ВПК дзіцячы сад-сярэдняя школа, другое і трэцяе – прадстаўнікі Ракаўскай СШ і Пугачоўскага ВПК.

У рамках праграмы “Здароўе” ў мясцовым сельскагаспадарчым прафесіянальным ліцэі прайшлі спаборніцтвы “Лыжня паклікала”. На старт разам с навучэнцамі выйшлі і педагагічныя работнікі.

А 28-29 студзеня ў г. п. Смілавічы прайшлі абласныя спаборніцтвы па зімовым шматбор’і “Здароўе”. У іх прымала ўдзел каманда ліцэя ў саставе 10 чалавек.