Галоўчанка запатрабаваў прыняць меры для своечасовага завяршэння падрыхтоўкі да веснавой сяўбы

Аграрный сектор и промышленность

Прэм’ер-міністр Беларусі Раман Галоўчанка запатрабаваў прыняць меры для своечасовага завяршэння падрыхтоўкі да веснавой сяўбы. Аб гэтым ён заявіў на пасяджэнні Прэзідыума Савета Міністраў, перадае карэспандэнт БЕЛТА.

У адпаведнасці з праграмай «Аграрны бізнес» вытворчасць прадукцыі раслінаводства і жывёлагадоўлі ў 2021 годзе павінна скласці на 2,4 працэнта больш за ўзровень 2020-га. «У сувязі з гэтым асноўная задача, якая цяпер стаіць перад усёй аграрнай галіной (ад Мінсельгасхарча да райвыканкамаў), — правядзенне веснавой пасяўной кампаніі на высокім арганізацыйным і тэхналагічным узроўні. Разам з тым зрэз сітуацыі на гэты момант паказвае, што не ўсе рэгіёны прымаюць неабходныя меры па правядзенні гэтых работ. Недастатковымі тэмпамі ідзе назапашванне мінеральных угнаенняў, менш за ўзровень мінулага года вывезена на палі арганікі. Найбольшыя пытанні ўзнікаюць да Віцебскай, Магілёўскай і Гомельскай абласцях. Такі стан недапушчальны. У нас ёсць усе магчымасці для выканання графікаў пастаўкі мінеральных угнаенняў беларускімі хімічнымі арганізацыямі», — сказаў Раман Галоўчанка.

У адпаведнасці з рашэннем кіраўніка дзяржавы і ўрада на правядзенне веснавых палявых работ прадугледжаны бюджэтныя сродкі ў памеры Br311 млн, ільготныя крэдыты банкаў на Br561 млн, а таксама крэдыты з субсідзіраваннем працэнтнай стаўкі пад дзяржзаказ для прадастаўлення авансаў на суму каля Br250 млн. «Урад у 2021 годзе прапрацаваў і ўнёс на разгляд кіраўніка дзяржавы прапановы па дадатковым фінансаванні гэтых работ у памеры да Br300 млн. Гэтыя сродкі павінны быць накіраваны на дазакупку мінеральных угнаенняў і гаруча-змазачных матэрыялаў. Таксама ўрад унёс на разгляд Прэзідэнту прапанову аб аказанні дадатковай падтрымкі ў выдзяленні паліва ў аб’ёме 57 тыс. т, вяртанне якога будзе ажыццёўлена за кошт бюджэту», — дадаў прэм’ер-міністр.

Паводле слоў Рамана Галоўчанкі, у шэрагу рэгіёнаў узнікаюць складанасці са своечасовай падрыхтоўкай машынна-трактарнага парка да веснавых палявых работ. «Стаіць задача да 25 сакавіка забяспечыць гатоўнасць тэхнікі на ўзроўні не ніжэйшым за 95 працэнтаў. У той жа час ёсць абгрунтаваныя сумненні ў тым, што гэта задача можа быць выканана ўсімі абласцямі. У прыватнасці, у Віцебскай вобласці гатоўнасць энерганасычаных трактароў — 83 працэнты, у Магілёўскай — 88 працэнтаў, у Гомельскай — 92 працэнты. Па камбінаваных глебаапрацоўчых агрэгатах у Віцебскай — 83 працэнты, Гомельскай — 84 працэнты, Магілёўскай вобласці — 85 працэнтаў», — адзначыў ён.

«Сённяшняе пасяджэнне Прэзідыума Савета Міністраў накіравана на прадметны разгляд сітуацыі з падрыхтоўкай да пасяўной кампаніі. Па яго выніках пытанняў па недастатковай гатоўнасці да веснавой сяўбы застацца не павінна», — падкрэсліў прэм’ер-міністр.