У Беларусі ў выхадныя стане цяплей

Кругозор

У Беларусі ў канцы тыдня стане цяплей, паведамілі карэспандэнту БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

«Ужо трэція суткі ў нашай краіне пануе вобласць павышанага атмасфернага ціску. Ва ўмовах малавоблачнага надвор’я яркае сонца ўсё больш прагравае прыземнае паветра. У многіх рэгіёнах пачынаецца метэаралагічная вясна (калі сярэднясутачныя тэмпературы ўстойліва станоўчыя)», — расказалі ў Белгідрамеце.

У пятніцу, 26 сакавіка, надвор’еўтваральным фактарам застанецца вобласць павышанага атмасфернага ціску, але з’явяцца воблакі, істотныя ападкі не чакаюцца. У начны і ранішні час месцамі могуць згушчацца непрацяглыя туманы, на асобных участках дарог будзе слізка. Вецер няўстойлівы слабы. Тэмпература паветра ўначы складзе ад мінус 3 да плюс 3 градусаў, па паўднёвым усходзе краіны — да мінус 5. Удзень будзе плюс 6-11, па заходняй палавіне паветра прагрэецца да 13 градусаў цяпла.

У суботу, 27 сакавіка, тэрыторыя краіны прадоўжыць знаходзіцца ў вобласці павышанага атмасфернага ціску, але паветраная маса, што паступае з Заходняй Еўропы, будзе яшчэ больш цёплай. Істотных ападкаў не чакаецца. Уначы і раніцай у нізінах і паблізу вадаёмаў чакаецца слабы туман. Вецер паўднёвы, паўднёва-заходні ад слабага да ўмеранага. Тэмпература паветра ўначы складзе ад мінус 2 да 5 градусаў цяпла. Удзень будзе плюс 8-15.

У нядзелю, 28 сакавіка, сітуацыя ў атмасферы зменіцца, надвор’е ў Беларусі пачнуць вызначаць франтальныя раздзелы ад скандынаўскага цыклону. Павялічыцца і згусціцца воблачнасць. Уначы месцамі, удзень на большай частцы тэрыторыі краіны пройдуць кароткачасовыя дажджы. У начны і ранішні час месцамі могуць узнікаць слабыя туманы. Вецер заходняй чвэрці ўмераны, месцамі парывісты. тэмпература паветра ўначы складзе ад нуля да плюс 5. Удзень будзе 4-11 градусаў цяпла.

У панядзелак, 29 сакавіка, надвор’е будзе фарміраваць няўстойлівая ўмерана цёплая паветраная маса, што паступае з Заходняй Еўропы. Месцамі па краіне пройдуць кароткачасовыя ападкі, у асноўным у выглядзе дажджу. Уначы і раніцай прагназуюцца слабыя туман і галалёд, на асобных участках дарог галалёдзіца. Вецер заходні, паўднёва-заходні слабы. Тэмпература паветра ўначы складзе ад мінус 3 да плюс 4 градусаў. Удзень будзе плюс 5-12.

У аўторак і сераду, 30-31 сакавіка, Беларусь апынецца пад уплывам атмасферных франтоў і вільготных няўстойлівых цёплых паветраных мас атлантычнага паходжання. У многіх рэгіёнах краіны пройдуць дажджы, а тэмпература паветра чакаецца ўначы ад 3 да 10 градусаў цяпла, у разгар дня — плюс 7-14, па паўднёвым захадзе краіны — плюс 15-17.