Рух і ёсць жыццё

Спорт

Асноўныя задачы ранішняй зарадкі – актываванне біялагічных працэсаў, павышэнне тонусу і працаздольнасці, стварэнне бадзёрага настрою.

Пачынаць выконваць зарадку неабходна з невялікай, лёгкай размінкі, затым прыступаць да асноўных практыкаванняў. Падчас размінкі лепш за ўсё рабіць пацягванні, плаўныя нахілы і павароты тулава і галавы. Размінку можна рабіць, не падымаючыся з ложка. Асноўны комплекс павінен быць скіраваны на мышцы шыі, плечавы пояс, рукі, корпус, ногі. Важна, каб практыкаванні не даводзілі да стомы, а падымалі тонус арганізма. У канцы зарадкі пажадана рабіць дыхальныя практыкаванні.

Карысць рухальнай актыўнасці, у тым ліку хадзьбы, больш чым відавочная. Хадзьба, акрамя іншага, – цудоўны сродак прафілактыкі захворванняў сэрца і сасудаў.

Для здаровых людзей абмежаванняў адносна хадзьбы практычна няма. Аднак пачынаць займацца ёй неабходна паступова, раз за разам нарошчваць тэмп, павялічваць адлегласць і час трэніроўкі. У пачатку пажадана праходзіць не болей за 3-5 кіламетраў (40-50 хвілін). На працягу 4-8 тыдняў арганізм перастройваецца, узнікае так званы базавы ўзровень трэніраванасці. На наступны этап неабходна адвесці ад 2 месяцаў да года.

Нягледзячы на ўніверсальнасць хадзьбы, усё ж маецца шэраг абмежаванняў. З асцярожнасцю да гэта віду фізічнай нагрузкі неабходна ставіцца людзям з артэрыяльнай гіпертэнзіяй, стэнакардыяй і тым, хто перанёс інфаркт ці аперацыю на сэрца.

Медыкі рэкамендуюць праходзіць не менш за 10 тыс. крокаў у суткі.

Святлана МАРЧЫК,

урач-гігіеніст РЦГіЭ