АДЗІНЫ МЕТАД ПРАФІЛАКТЫКІ – ВАКЦЫНАЦЫЯ

Общество

Позняя восень і зімовы перыяд у нашым рэгіёне заўсёды звязаны з павелічэннем вострых рэспіраторных вірусных інфекцый (ВРВІ). Нават у людзей з моцным імунітэтам зімой ахоўныя сілы арганізма слабеюць. Асноўныя прычыны гэтага – недахоп вітамінаў (асабліва вітаміна С), пераахаладжэнне, нервовыя стрэсы, курэнне, празмернае ўжыванне алкаголю, прыём антыбіётыкаў і іншыя фактары.

Менш хварэюць на грып фізічна актыўныя людзі, якія шмат часу праводзяць на свежым паветры, правільна і рацыянальна харчуюцца, не маюць шкодных звычак. У перыяд з лістапада да мая рэкамендуецца прымаць вітамінныя прэпараты, перавагу аддаваць натуральным, раслінным, напрыклад, настою пладоў шыпшыны, сокам абляпіхі, чорных парэчак і інш.

Адзіным метадам спецыфічнай прафілактыкі грыпу з’яўляецца вакцынацыя. Зробленая сучаснымі супрацьгрыпознымі вакцынамі, яна абараняе ад захворвання грыпам каля 80 працэнтаў здаровых дарослых і дзяцей. Зрабіць прышчэпку супраць грыпу можна ў медыцынскіх установах па месцы жыхарства (паліклініках, урачэбных амбулаторыях, участковых бальніцах).

Калі вы прастудзіліся:

– хаця б тыдзень паляжыце ў пасцелі. Тады хвароба пройдзе хутчэй, і вы “не падорыце” вірусы спадарожнікам у транспарце ці саслужыўцам;

– ужывайце не менш за 2 літры вадкасці ў дзень. З ёй з арганізма выводзяцца прадукты інтаксікацыі;

– адмоўцеся ад цяжкай мясной ежы, пераключыцеся на малочна-раслінныя стравы;

– прымайце вітамін С, бо ён павышае выпрацоўку інтэрферона, стымулюе дзейнасць імуннай сістэмы;

– каб не заразіць хатніх, без неабходнасці не выходзьце з пакоя, а калі ўзнікне такая патрэба, надзеньце маску з 6 слаёў марлі. Не карыстайцеся традыцыйнымі тканевымі насавымі хустачкамі, замяніце іх аднаразовымі сурвэткамі;

– часцей мыйце рукі;

– абавязкова праветрывайце пакой. Цяжкае, з вірусамі паветра таксама небяспечнае.

Вольга СЯЛІЦКАЯ,

урач-эпідэміёлаг

 



Добавить комментарий