Асноўнай тэмай Дня беларускага пісьменства стане Год народнага адзінства — Бузоўскі

2021 - Год народнага адзінства

Асноўнай тэмай Дня беларускага пісьменства стане Год народнага адзінства, заявіў сёння журналістам намеснік міністра інфармацыі Ігар Бузоўскі, перадае карэспандэнт БЕЛТА.

«У бягучым годзе ў час Дня беларускага пісьменства пройдуць не толькі традыцыйныя мерапрыемствы, але і новыя падзейныя праекты. Гэта праекты, якія сёння ідуць сугучна з падзеямі ў краіне. У канцэпцыю свята закладзена тэма Года народнага адзінства, якая стане неад’емнай часткай нашага свята як на ўзроўні твораў, кніг, так і на ўзроўні праектаў, якія будуць прэзентаваны», — адзначыў Ігар Бузоўскі.

Паводле яго слоў, арганізатары імкнуліся адлюстраваць знакавыя падзеі для краіны, гісторыка-культурную і духоўную спадчыну Капыля, якія аб’яднаны пісьменніцкім словам, творамі. Сярод такіх падзей 80-годдзе з дня пачатку Вялікай Айчыннай вайны.

Традыцыйна Дзень беларускага пісьменства пачнецца з Рэспубліканскай навукова-асветнай экспедыцыі «Дарога да святынь», якая праходзіць пры падтрымцы Беларускай праваслаўнай царквы. Адправіцца экспедыцыя 1 верасня, а завершыцца 5 верасня ў Капылі.

Паколькі акцэнт пастаўлены на Год народнага адзінства, то і цэнтральная пляцоўка «Адзінства» будзе аформлена ў адпаведнасці з зададзенай тэмай — на ёй прадставяць газеты і часопісы 1921-1939 гадоў. «Мы пастараемся гісторыю наблізіць да сучаснасці. Моладзі, людзям, якія сёння, можа, не хочуць чытаць газету, але мы хочам падаць яе так, каб яна была цікавай, яркай і каб вярнула ў тую гісторыю, калі беларусы імкнуліся на працягу доўгага часу да адзінства, аб’яднання зямель і магчымасці жыць на сваёй роднай зямлі. Гэта гістарычныя факты, якія будуць прэзентаваны праз газеты, выданні, прыватныя калекцыі», — расказаў намеснік міністра.

«Выставу газет і часопісаў мы рыхтуем сумесна з Міністэрствам інфармацыі і Нацыянальным гістарычным музеем. Яна будзе называцца «17 верасня — Дзень народнага адзінства». Планавалася адкрыць яе менавіта 17 верасня ў гістарычным музеі, па прапанове Мінінфармацыі ўсё ж такі вырашылі, што ў Капылі ў час свята мы зробім анонс гэтай вялікай выставы. У Капылі будуць паказаны ўнікальныя артэфакты таго часу, звязаныя з уз’яднаннем беларускага народа. Напрыклад, Нацыянальны гістарычны музей прадставіць плашч і кабуру Сяргея Прытыцкага, які падпісваў у Маскве дакументы па ўваходжанні Заходняй Беларусі ў склад БССР. Будуць таксама паказаны ўнікальныя газеты, што выдаваліся з 1921 па 1939 год на тэрыторыі Заходняй Беларусі. І паверце, гэтых газет у нас у краіне практычна няма», — акцэнтаваў увагу гісторык, калекцыянер, лаўрэат прэміі Прэзідэнта «За духоўнае адраджэнне» Уладзімір Ліхадзедаў.

На выставе будзе прадстаўлена падборка матэрыялаў, каб госці свята змаглі ўбачыць, што ў тыя гады пісалі беларускія газеты і часопісы па тэме аб’яднання Заходняй Беларусі і БССР. «Беларускія газеты тады не былі кансалідаваны: адны падтрымлівалі тых, другія — тых. Але ў плане беларускага пытання ўсе яны былі адзіныя — Беларусь знаходзілася пад прыгнётам і яна павінна быць свабоднай», — падкрэсліў гісторык.

Акрамя арыгінальных выданняў арганізатары падрыхтуюць калажы з такімі публікацыямі, каб любы жадаючы мог узяць іх сабе на памяць.