Цёплае з дажджамі надвор’е чакаецца ў Беларусі ў выхадныя

Кругозор

Цёплае з дажджамі надвор’е чакаецца ў Беларусі ў выхадныя, паведамілі БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

«Услед за актыўным атмасферным фронтам, што прайшоў у аўторак, на тэрыторыю Беларусі пачало паступаць больш халаднаватае паветра з Заходняй Еўропы. У сярэдзіне тыдня тэмпературны фон у рэспубліцы панізіўся і цяпер знаходзіцца ў межах плюс 14-19 градусаў, што ў асноўным каля кліматычнай нормы, а па захадзе краіны на 2-3 градусы ніжэй за яе, пры гэтым максімальная тэмпература паветра вышэй за 19-24 градусы не падымалася», — расказалі сіноптыкі.

У бліжэйшыя дні захаваецца ўплыў атмасферных франтоў і няўстойлівых, але ўмерана цёплых паветраных мас, што паступаюць з Заходняй Еўропы.

У пятніцу, 20 жніўня, будзе пераважна без ападкаў, толькі ўдзень месцамі па захадзе краіны пройдуць кароткачасовыя дажджы, прагрымяць навальніцы. Уначы і раніцай у асобных раёнах чакаецца слабы туман. Тэмпература паветра ўначы складзе плюс 8-14 градусаў. Удзень будзе ад плюс 20 па паўночным захадзе да 27 градусаў цяпла па паўднёвым усходзе Беларусі.

У суботу, 21 жніўня, пры праходжанні атмасфернага фронту ўначы пераважна па заходняй палове, раніцай і ўдзень на большай частцы тэрыторыі рэспублікі пройдуць кароткачасовыя дажджы. У асобных раёнах прагрымяць навальніцы. Тэмпература паветра ўначы складзе плюс 8-15 градусаў. Удзень будзе плюс 18-25, па паўднёвым усходзе краіны да 27 градусаў цяпла.

У нядзелю, 22 жніўня, Беларусь будзе знаходзіцца ў вобласці павышанага атмасфернага ціску, толькі па поўначы краіны будзе адчувацца ўплыў няўстойлівых паветраных мас, што паступаюць з Балтыйскага мора. Будзе пераважна без ападкаў, толькі ўдзень у асобных раёнах па поўначы рэспублікі магчымы невялікія кароткачасовыя дажджы. Уначы і раніцай прагназуецца слабы туман. Тэмпература паветра ўначы складзе плюс 6-13 градусаў. Удзень паветра прагрэецца да плюс 16-23, па паўднёвым усходзе — да 25 градусаў цяпла.

У пачатку наступнага тыдня паўднёвая частка краіны будзе знаходзіцца пад уплывам маларухомага атмасфернага фронту, што ідзе з паўднёвага захаду Еўропы, пераважна па паўднёвай палове рэспублікі пройдуць кароткачасовыя дажджы. Па поўначы Беларусі, дзе яшчэ будзе адчувацца ўплыў вобласці павышанага атмасфернага ціску, ападкі малаверагодныя. Тэмпература паветра ўначы будзе вагацца ад плюс 5 па поўначы да плюс 14 градусаў па поўдні краіны. Удзень паветра прагрэецца да 15-23 градусаў.