Мінпрацы нагадала аб новых пенсійных гарантыях шматдзетным маці

Важное

Міністэрства працы і сацыяльнай абароны ў сваім Telegram-канале нагадала аб новаўвядзенні ў пенсійным забеспячэнні шматдзетных маці, па якім з гэтага года павялічана агульная працягласць часу па доглядзе дзіцяці, якая ўключаецца ў працоўны стаж, а таксама зніжаны неабходны пенсійны ўзрост, паведамляе БЕЛТА.

Норма ўступіла ў сілу з 1 студзеня гэтага года ў адпаведнасці з указам «Аб сацыяльнай падтрымцы асобных катэгорый грамадзян». Шматдзетным маці, якія нарадзілі пяць і больш дзяцей і выхавалі іх да 8-гадовага ўзросту, прадастаўлена права на працоўную пенсію па ўзросце са зніжэннем агульнаўстаноўленага пенсійнага ўзросту на 5 гадоў. Пры гэтым устаноўлены паніжаныя патрабаванні да стажу работы: патрабуецца 5 гадоў работы з выплатай абавязковых страхавых узносаў (страхавы стаж) і 15 гадоў агульнага стажу (з улікам страхавога).

Незалежна ад узросту пенсія па ўзросце назначаецца шматдзетным маці, якія нарадзілі пяць і больш дзяцей і выхавалі іх да 16-гадовага ўзросту, пры стажы работы на прадпрыемствах сельскай гаспадаркі непасрэдна ў вытворчасці сельскагаспадарчай прадукцыі не менш за 10 гадоў (без заліку ў стаж часу догляду дзяцей).

Шматдзетным маці, якія нарадзілі чацвярых дзяцей і выхавалі іх да 8-гадовага ўзросту, працоўная пенсія па ўзросце назначаецца пасля дасягнення агульнаўстаноўленага пенсійнага ўзросту пры паніжаным страхавым стажы — 10 гадоў і наяўнасці 20 гадоў агульнага стажу (з улікам страхавога).

У агульны стаж разам з перыядамі работы залічваюцца таксама перыяды догляду дзяцей ва ўзросце да 3 гадоў агульнай працягласцю не больш за 12 гадоў.

Нагадаем, для назначэння пенсіі па ўзросце на агульных падставах у 2021 годзе патрабуецца не менш за 18 гадоў страхавога стажу. Страхавы стаж штогод павялічваецца на 6 месяцаў да 20 гадоў да 2025 года.